នគរបាល ប៉ុស្តិ៍ផ្សារដើមថ្កូវ ឃាត់ខ្លួន បុរសស្រ្តី ពីរនាក់ ក្នុងបទជួញដូរ គ្រឿងញៀន

ភ្នំពេញ៖ នៅម៉ោងប្រមាណ១៤ និង៣០ នាទី ថ្ងៃទី១៦ ខែកញ្ញា ឆ្នាំ២០១៤ នេះ កម្លាំងនគរបាលប៉ុស្តិ៍ផ្សារ ដើមថ្កូវ បានឃាត់ខ្លួនជនសង្ស័យពីរនាក់ ពីបទជួញដូរគ្រឿងញៀន ស្ថិតនៅចំណុចផ្ទះសំណាក់ ហាក់ឆាយហេង ទីតាំងលេខ៦៧៨ បន្ទប់លេខ១០៤ ផ្លូវលេខ២៧១ ក្នុងសង្កាត់ផ្សារដើមថ្កូវ ខណ្ឌចំការមន។

មន្រ្តីនគរបាលមូលដ្ឋានបានឲ្យដឹងថា ជនសង្ស័យដែលត្រូវឃាត់ខ្លួននោះ ទី១.ឈ្មោះ វ៉ន ចាន់រិទ្ធ ភេទប្រុស អាយុ២៩ ឆ្នាំ មានទីលំនៅនៅភូមិក្បាលត្នោត ឃុំគគី ស្រុកកៀនស្វាយ ខេត្តកណ្តាល ឯជនសង្ស័យទី២.ឈ្មោះ ថា ស្រីឃីម ភេទស្រី អាយុ៣៤ឆ្នាំ មានទីលំនៅ ក្នុងភូមិជ្រោយអំពិល សង្កាត់ព្រែកឯង ខណ្ឌច្បារអំពៅ។

សាក្សីនៅកន្លែងកើតហេតុបានឲ្យដឹងថា នៅម៉ោង៣ និង៣០ នាទីរសៀលថ្ងៃទី១៦ ខែកញ្ញា ឆ្នាំ២០១៤ ម្ចាស់ផ្ទះសំណាក់ ហាក់ឆាយហេង បានរាយការណ៍មកកាន់សមត្ថកិច្ចតាមទូរស័ព្ទថា នៅក្នុងបន្ទប់ ជួលលេខ១០៤ សង្ស័យមានករណីលក់គ្រឿងញៀន ហើយបានស្នើសុំឲ្យសមត្ថកិច្ចមកពិនិត្យ។

សាក្សីបានឲ្យដឹងទៀតថា ក្រោយទទួលដំណឹង លោក សេង វណ្ណៈ មេប៉ុស្តិ៍នគរបាលផ្សារដើមថ្កូវ ក៏បាន ចាត់កម្លាំងចុះទៅពិនិត្យ ដោយសហការជាមួយអាជ្ញាធរមូលដ្ឋាន និងម្ចាស់ផ្ទះសំណាក់ ក៏បានឆែកឆេឃើញ បុរស នារី ពីរ នាក់នេះកំពុងច្រកម្ស៉ៅក្រាមស ពីស្បោងធំ ដាក់ចូលកូនថង់តូចៗ។

មន្រ្តនគរបាលមូលដ្ឋានក៏បានឲ្យដឹងដែរថា ក្រោយការត្រួតពិនិត្យ កម្លាំងសមត្ថកិច្ចរកឃើញ ម្ស៉ៅក្រាមសថ្លា ចំនួន៧ កញ្ចប់តូច និង១កញ្ចប់ធំ ដកហូតជញ្ជីងសម្រាប់ថ្លឹងគ្រឿងញៀនចំនួន១ ឧបករណ៍សម្រាប់ ជក់ថ្នំា១កំផ្លេ ឧបករណ៍សម្រាប់ចូលថ្នាំ និងវត្ថុតាងមួយចំនួនទៀត។

មន្រ្តីនគរបាលក៏បានឲ្យដឹងទៀថា ជនសង្ស័យទាំងពីរនាក់នេះ កំពុងត្រូវបានបញ្ជូនខ្លួនបន្តទៅអធិការដ្ឋាននគរបាល ខណ្ឌចំការមន ដើម្បីបន្តនីតិវិធីតាមផ្លូវច្បាប់៕