ភ្នំពេញ៖ អ្នកស្រី តែ ច័ន្ទមនី ប្រធានស្តីទីគណៈកម្មការទី៣ នៃរដ្ឋសភា (គណៈកម្មការ ផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក) បានស្នើឲ្យនាយករដ្ឋមន្រ្តីកម្ពុជា សម្តេចតេជោ ហ៊ុន សែន ជួយអន្តរាគមន៍ក្រសួង ឬស្ថាប័នពាក់បញ្ឈប់ការកាប់បំផ្លាញព្រៃឈើ និងជួយអភិរក្សព្រៃ សត្វព្រៃ និង ពូជត្រីមាស នៅតំបន់អារ៉ែង ស្រុកថ្មបាំង ខេត្តកោះកុង។ លិខិតសុំអន្តរាគមន៍នេះ ធ្វើឡើងតាមរយៈសម្តេច ហេង សំរិន ប្រធានរដ្ឋសភា ហើយសម្តេច ហេង សំរិន ក៏បានទទួលរួចហើយដែរ នៅថ្ងៃទី២៥ ខែកញ្ញា ឆ្នាំ២០១៤។
នៅក្នុងលិខិតសុំកិច្ចអន្តរាគមន៍ របស់ អ្នកស្រី តែ ច័ន្ទមនី ប្រធានស្តីទីគណៈកម្មការមកពីគណបក្សសង្រ្គោះជាតិ ដែលមជ្ឈមណ្ឌលព័ត៌មានដើមអម្ពិល ទទួលបាននៅថ្ងៃទី២៦ ខែកញ្ញា បានស្នើទៅសម្តេចតេជោ ហ៊ុន សែន ថា «នាងខ្ញុំមានកិត្តិយស សូមគោរពជម្រាបជូនសម្តេចនាយករដ្ឋមន្រ្តី មេត្តាជួយធ្វើអន្តរាគមន៍ទៅក្រសួង ដែល ពាក់ព័ន្ធទៅនឹងបញ្ហាមួយចំនួន ដូចជាការកាប់ព្រៃឈើ ការគ្រោង និងធ្វើវារីអគ្គិសនីនៅតំបន់អារ៉ែង ការជួយអភិរក្សព្រៃឈើ សត្វព្រៃ និងសត្វត្រី (ត្រីនាគ ត្រីខ្មៅ) នៅតំបន់អារ៉ែង។ជាពិសេសការ បារម្ភខ្លាំងរបស់ ក្រុមប្រឹក្សាឃុំជាប់ឆ្នោត និងសហគមន៍ជាតិដើមភាគតិច ក្នុងការបាត់បង់ប្រពៃណីវប្បធម៌របស់ពួកគាត់»។
អ្នកស្រី តែ ច័ន្ទមនី តាមរយៈលិខិតដដែលនេះ បានបញ្ជាក់ថា ការធ្វើវារីអគ្គិសនី មានផលប៉ះពាល់ ដល់ជម្រកសត្វព្រៃ ត្រី បក្សី ចំណែកផល ដែលទទួលបានត្រឹមតែ ១០៦ មេហ្គាវ៉ាត់ប៉ុណ្ណោះនៅរដូវវស្សា ឯរដូវប្រាំង គឺមានត្រឹមតែចំនួន ៥០-៦០មេហ្គាវ៉ាត់ ហើយការធ្វើនេះនឹងធ្វើឲ្យមានការខូចខាតដីព្រៃ និងដីកសិកម្ម ជាង ២ម៉ឺនហិកតា នៃផ្ទៃដីសរុប ៕
