កំពង់ធំ ៖ លោក អ៊ុត សំអន អភិបាល ខេត្តកំពង់ធំ កាលពីព្រឹកថ្ងៃទី១៣ ខែតុលា ឆ្នាំ២០១៤ បានដឹកនាំ ប្រជុំលើកផែនការ ត្រៀមបូកសរុបការងារ ភូមិ-ឃុំ មានសុវត្ថិភាព ប្រចាំត្រីមាសទី៣ និងលើកទិសដៅបន្ត ឆ្នាំ២០១៤។
បន្ទាប់ពីលោក ស្នងការរង នគរបាល មូលដ្ឋាន បានចូលរួម មតិយោបល់ ពិភាក្សា បង្ហាញនូវលទ្ធផល ចាត់តាំង អនុវត្តគោល នយោបាយ ភូមិ-ឃុំ មានសុវត្ថិភាព លទ្ធផលរៀបចំ វេទិកាសាធារណៈ លទ្ធផលកសាង ចលនា ប្រជាការពារ និងលទ្ធផលប្រឡង ប្រណាំង ក្នុងនោះ របាយការណ៍ក្នុងត្រីមាសទី៣ឆ្នាំ២០១៤ ស្រុក ក្រុង ដែលបានធ្វើការផ្សព្វផ្សាយ មានចំនួន ១១១០ លើក ប្រជាពលរដ្ឋ ចូលរួម៣២ម៉ឺននាក់។
វេទិកាសាធារណៈ ក្នុងសហគមន៍ចំនួន ៧៧ លើកប្រជាពលរដ្ឋ ចូលរួម ចំនួនមួយ ម៉ឺននាក់ ។ ផ្សព្វផ្សាយ ច្បាប់ស្តីពីការ ប្រើប្រាស់អាវុធជាតិផ្ទុះ គ្រប់ប្រភេទ ប្រជាពលរដ្ឋ ភ្ញាក់រលឹក ប្រគល់
អាវុធAK១ដើម គ្រាប់បែក២គ្រាប់ គ្រាប់៦០mm ចំនួន៤ គ្រាប់ និងគ្រាប់យុទ្ធភ័ណ មួយចំនួនទៀត ព្រមទាំងរៀបចំដាក់ប្រអប់សំបុត្រ ទទួលលិខិត ព័ត៌មានផ្សេងៗ ចំនួន ១៩៩ ប្រអប់ ។
លោក អ៊ុត សំអន បានមានប្រសាសន៍ បូកសរុបវាយតម្លៃ ខ្ពស់ចំពោះលទ្ធផល បានកន្លងមក និងដាក់ទិសដៅ សំខាន់មួយចំនួន ជុំវិញលក្ខណៈសម្បត្តិ ៩ យ៉ាង ឯកសារអនុវត្ត គោលនយោបាយ ភូមិ -ឃុំ មានសុវត្ថិភាព សំដៅពង្រឹង សន្តិសុខសណ្តាប់ធ្នាប់ សង្គមក្នុងមូលដ្ឋាន បំរើសេចក្តីសុខជូនប្រជាជន៕
