ភ្នំពេញ ៖ គណៈបញ្ជាការឯកភាព ខណ្ឌសែនសុខ នារសៀលថ្ងៃទី១៣ ខែតុលា ឆ្នាំ២០១៤ នេះ បានបើកកិច្ច ប្រជុំត្រួតពិនិត្យ ការអនុវត្ដគោល នយោបាយ ភូមិ-ឃុំ មានសុវត្ថិភាព ក្នុងរយៈពេលកន្លងមកនេះ។
កិច្ចប្រជុំរបស់ គណៈបញ្ជាការ ឯកភាពខណ្ឌសែនសុខ ខាងលើនេះ បានប្រព្រឹត្ដទៅក្រោម អធិបតីភាព លោក ម៉ម ប៊ុនហេង ប្រធានក្រុមការងារ ចុះជួយ ខណ្ឌសែនសុខ និងលោកអភិបាលខណ្ឌ លី សាវេត ព្រមទាំងមាន ការចូលរួម ពីថ្នាក់ដឹកនាំខណ្ឌ អធិការនគរបាលខណ្ឌ មន្ដ្រីពាក់ព័ន្ធ និងប្រជាពលរដ្ឋ នៅក្នុងមូលដ្ឋាន ជាច្រើននាក់ផ្សេងទៀត ។
នៅក្នុងកិច្ចប្រជុំនេះ អភិបាលខណ្ឌសែនសុខ លោក លី សាវេត បានលើកឡើងពី លទ្ធផលការងារដែល សម្រេច បាន នាពេល កន្លង ទៅរបស់អាជ្ញាធរ និង សមត្ថកិច្ច តាមបណ្ដាសង្កាត់-ប៉ុស្តិ៍រដ្ឋបាល លើការរៀប ចំវេទិកា ភូមិ-ឃុំ មានសុវត្ថិភាព តាម រយៈការអញ្ជើញ ចូលរួមពីសំណាក់ ប្រជាពលរដ្ឋ ជាច្រើននាក់ ដើម្បីលើក ឡើងនូវបញ្ហា និងសំណូមពរផ្សេងៗរបស់ពួកគាត់។
លោកអភិបាលខណ្ឌបានបញ្ជាក់ទៀតថា តាមរយៈ វេទិកា ភូមិ-ឃុំ មានសុវត្ថិភាព នាពេលកន្លងទៅនេះ ថ្នាក់ដឹក នាំ ខណ្ឌ និងសមត្ថកិច្ចពាក់ព័ន្ធ ក៏បានចូល រួមដោះ ស្រាយនូវ កង្វល់និងការលើកឡើងផ្សេងៗ របស់ ប្រជាពលរដ្ឋ មូលដ្ឋាន តាមរយៈការសំណូមពរ របស់ពួកគាត់ ។
ជាមួយគ្នានេះ លោក លី សាវេត ជាប្រធាន គណៈបញ្ជាការ ឯកភាពខណ្ឌ ក៏បានបង្ហាញ ពីផែនការ និងទិស ដៅបន្ដ ចំពោះកិច្ចការ មួយនេះ តបតាមការ ណែនាំ របស់រាជរដ្ឋាភិបាល និងក្រសួងមហាផ្ទៃ ដើម្បីចូលរួមទប់ ស្កាត់ បទល្មើស រក្សាសន្ដិសុខ សុវត្ថិភាព និងសណ្ដាប់សាធារណៈជូន ប្រជាពលរដ្ឋ នៅតាមបណ្ដា មូលដ្ឋាន ទាំងអស់ ។
ដោយឡែក លោក ម៉ម ប៊ុនហេង បានជំរុញឱ្យ ថ្នាក់ដឹកនាំខណ្ឌ និងសមត្ថកិច្ច ពាក់ព័ន្ធ បន្ដយកចិត្ដទុកដាក់ ដោយ ការទទួលខុសត្រូវខ្ពស់ ចំពោះបញ្ហា មួយនេះ និងខិតខំ ដោះស្រាយរាល់ បញ្ហាក៏ ដូចជា សំណូមពរ របស់ ប្រជាពលរដ្ឋ តាម មូលដ្ឋាន ដែលពួកគាត់បានចូលរួម នៅក្នុងវេទិកា ភូមិ-ឃុំ មានសុវត្ថិភាពទាំងនេះ៕
