កំពង់ធំ ៖ កម្លាំងនគរបាល ការិយាល័យចរាចរណ៍ផ្លូវគោក នៃស្នងការដ្ឋាននគរបាល ខេត្តកំពង់ធំ បានធ្វើ ការឃាត់ខ្លួន ជនសង្ស័យម្នាក់ ជាប់ពាក់ព័ន្ធ ការបង្កគ្រោះចរាចរណ៍ ដែលបង្កឲ្យមានមនុស្សស្លាប់ និងរបួស ចំនួន៣នាក់ កាលពីថ្ងៃទី១៦ ខែតុលា ឆ្នាំ២០១៤ កន្លងទៅ ។
មន្រ្តីនគរបាលការិយាល័យចរាចរណ៍ផ្លូវគោក ខេត្តកំពង់ធំ បានថ្លែងឲ្យដឹងថា ក្រោយបង្ក គ្រោះថ្នាក់ចរាចរណ៍ បណ្តាលឲ្យស្លាប់មនុស្សម្នាក់ និងរបួសធ្ងន់ ចំនួន២នាក់ នៅក្រុងស្ទឹងសែន កាលពីថ្ងៃទី១៦ ខែតុលា ឆ្នាំ២០១៤ ជនបង្កបានរត់គេចខ្លួន ដោយមិនចូលមកបង្ហាញមុខ និងទទួលខុសត្រូវ តាមផ្លូវច្បាប់នោះឡើយ ។
មន្រ្តីនគរបាលបានបន្តទៀតថា ក្រោយទទួលបានបទបញ្ជា ពីសំណាក់ស្នងការនគរបាលខេត្ត លោកឧត្តមសេនីយ៍ ជូ សំអាន និងមានការឯកភាពតាមផ្លូវច្បាប់ ពីសំណាក់ ព្រះរាជអាជ្ញា អមសាលាដំបូងខេត្ត កម្លាំងនគរបាល ជំនាញ បានធ្វើការស្រាវជ្រាវ រហូតទៅដល់ការចាប់ខ្លួន ជនបង្ករូប យកមកផ្តន្ទាទោស តាមផ្លូវច្បាប់។
បើតាមសមត្ថកិច្ច ជនបង្កគ្រោះថ្នាក់ចរាចរណ៍ខាងលើនេះ មាន ឈ្មោះ អឿង នគរភក្តី ភេទប្រុស អាយុ៣៣ឆ្នាំ រស់នៅ ភូមិវ័រយាវ ឃុំត្រពាំងឬស្សី ស្រុកកំពង់ស្វាយ ។
បច្ចុប្បន្ន ជនបង្កគ្រោះថ្នាក់ ចរាចរណ៍ខាងលើនេះ ត្រូវបានឃុំខ្លួន ជាបណ្តោះអាសន្ន នៅការិយាល័យចរាចរណ៍ ផ្លូវគោក ដើម្បីកសាងសំណុំ រឿងបញ្ជូនទៅ កាន់តុលាការចាត់ការតាមផ្លូវច្បាប់ ៕
