ត្បូងឃ្មុំ ៖ ជនសង្ស័យ ចំនួន២នាក់ ដែលជាប់ពាក់ព័ន្ធ និងសកម្មភាព ចែកចាយគ្រឿងញៀន ត្រូវបានកម្លាំង នគរបាលការិយាល័យ ប្រឆាំងការជួញដូរគ្រឿងញៀន នៃស្នងការដ្ឋាននគរបាលខេត្តត្បូងឃ្មុំ សហការជាមួយ កម្លាំងនគរបាលមូលដ្ឋាន ស្រុកពញាក្រែក ធ្វើការស្រាវជ្រាវ រហូតឈានទៅដល់ការឃាត់ខ្លួន ព្រមទាំងដកហូត ថ្នាំញៀន ជាប្រភេទក្រាម ពណ៌ស ថ្លាចំនួន ១៧កញ្ចប់តូចផងដែរ ។
មន្រ្តីនគរបាល ការិយាល័យប្រឆាំង ការជួញដូរ គ្រឿងញៀន បានថ្លែងឲ្យដឹងថា ប្រតិបត្តិការ តាមចាប់ខ្លួន មុខសញ្ញា ចែកចាយ គ្រឿងញៀនទាំង២នាក់ ខាងលើនេះ បានធ្វើឡើង កាលពីវេលាម៉ោង ១១៖១៥នាទី ព្រឹកថ្ងៃទី២៥ ខែតុលា ឆ្នាំ២០១៤ ស្ថិតនៅ ភូមិជីមាន់កណ្តាល ឃុំក្រែក ស្រុកពញាក្រែក ខេត្តត្បូងឃ្មុំ ។
មន្រ្តីនគរបាល បានបញ្ជាក់ថា ក្រោយទទួលបានព័ត៌មាន នៃសកម្មភាព ចែកចាយ គ្រឿងញៀន ខាងលើនេះ កម្លាំងនគរបាលជំនាញ ការិយាល័យ សហការ ជាមួយកម្លាំង នគរបាលប៉ុស្តិ៍ឃុំក្រែក ក្រោមការបញ្ជាផ្ទាល់ ពីសំណាក់ ស្នងការ នគរបាលខេត្ត លោកឧត្តមសេនីយ៍ ម៉ៅ ពៅ បានចុះទៅឃាត់ខ្លួន ជនសង្ស័យទាំង២នាក់ និងដកហូតថ្នាំញៀន ប្រភេទក្រាមពណ៌សថ្លា ចំនួន១៧ កញ្ចប់តូចផងដែរ។
បើតាមការបញ្ជាក់ពីមន្រ្តីនគរបាល ដដែល ជនសង្ស័យ ទាំង២នាក់ រួមមានទី១ ឈ្មោះ សុខ អឿន ភេទប្រុស អាយុ៤២ឆ្នាំ និងទី២ឈ្មោះ អឿន សុធី ភេទប្រុស អាយុ១៤ឆ្នាំ ។
ក្រោយការចាប់ខ្លួន ជនសង្ស័យទាំង២នាក់ ត្រូវបាននាំខ្លួន ទៅសួរនាំ និងឃុំខ្លួន ជាបណ្តោះអាសន្ននៅស្នង ការដ្ឋាន នគរបាលខេត្តត្បូងឃ្មុំ ដើម្បីចាត់ ការបន្តតាមផ្លូវច្បាប់ ៕
