អគ្គរង អន្តោប្រវេសន៍បើក ប្រតិបត្តិការបង្រ្កាប ជនបរទេស ភ្នាល់ល្បែងបាល់ ខុសច្បាប់តាម ONLINE

ព្រះសីហនុ៖ អគ្គនាយកដ្ឋាន អន្តោប្រវេសន៍ នៃក្រសួងមហាផ្ទៃ បើកប្រតិបត្តិការ បង្រ្កាបជនបរទេស បើកភ្នាល់បាល់ ខុសច្បាប់តាម ONLINE ឃាត់ខ្លួនបាន ជនជាតិបរទេសម្នាក់ និងខ្មែរ២នាក់ ។ កិច្ចប្រតិបត្តិការនេះដឹកនាំបញ្ជា ដោយលោក ហួត វិចិត្រ ព្រះរាជអាជ្ញាររង អមសាលាដំបូង ខេត្តព្រះសីហនុ លោក ឡុង វិសាល ចៅក្រមសាលាដំបូងខេត្តព្រះសីហនុ  និងលោកឧត្តមសេនីយ៍ឯក ឃុន សំបូរ អគ្គនាយករង អគ្គនាយកដ្ឋានអន្តោប្រវេសន៍ ។

ប្រភពពីសមត្ថកិច្ចបានអោយដឹងថា កិច្ចប្រតិបត្តិការបង្រ្កាបនេះធ្វើឡើងកាលពីវេលាម៉ោង៣រសៀល ថ្ងៃទី២៨ ខែតុលា ឆ្នាំ២០១៤ នៅផ្ទះជួលជនជាតិបរទេស មួយកន្លែងស្ថិតក្នុងក្រុម២ ភូមិ២ សង្កាត់លេខ៣ ក្រុងខេត្តព្រះសីហនុ ។ ប្រភពដដែល បានថ្លែងបន្តអោយដឹងបន្ថែមទៀតថា ជនសង្ស័យនេះនិងយកទៅសាកសួរបន្ថែមនៅ ស្នងការដ្ឋាន នគរបាលខេត្តព្រះសីហនុ ដើម្បីស្វែងរកបក្សពួក និងទីតាំងផ្សេងទៀតផងដែរ ៕