អាជ្ញាធរបញ្ជាក់ ពីការដកចេញចម្រូង ដែកនៅតាម សួនច្បារ មុខព្រះបរម រាជវាំង

ភ្នំពេញ ៖ ក្នុងរយៈពេល ប៉ុន្មានថ្ងៃមក នេះ ជាពិសេស កាលពីអំឡុង មុនព្រះរាជ ពិធីបុណ្យអុំទូក មានសេចក្ដី រាយ ការណ៍និង ព័ត៌មានជាច្រើន ត្រូវបានគេចែករំលែកនិង បង្ហោះនៅលើ បណ្ដាញសង្គម ហ្វេសប៊ុក ស្ដីពី ចម្រូងដែក ដែលត្រូវបានគេឃើញបង្កប់នៅ តាមសួនច្បារ មុខព្រះបរមរាជវាំង ដែល ព័ត៌មានខ្លះក៏បានលើកឡើង ពីគ្រោះថ្នាក់ ដល់ប្រជាពលរដ្ឋ ទៅដើរលេងកំសាន្ដក្នុងព្រះ រាជពិធីបុណ្យអុំទូក ។

ចំពោះព័ត៌មានដែលត្រូវបានគេផ្សព្វផ្សាយនិងដើម្បីបំបាត់ការមន្ទិលសង្ស័យក៏ដូចជា ការព្រួយបារម្ភ ចំពោះចម្រូង ដែកនៅតាមសួនច្បារមុខព្រះ បរមរាជវាំងនោះ អាជ្ញាធរ មានសមត្ថកិច្ច បានចេញមក ពន្យល់និងអះអាងថា ចម្រូង ដែកទាំងនេះ ត្រូវបានក្រុមការងារដើរប្រមូលនិងដកចេញអស់ហើយ កាលពីប៉ុន្មានថ្ងៃមុននេះ ។

មន្ដ្រីសាលាខណ្ឌដូនពេញ បានឱ្យដឹងថា ចំពោះព័ត៌មានខាងលើនេះ ពិតជាមានមែន ដែលក្រុមជាង បានបោះ ចម្រូង ដែកទាំងនេះ នៅលើស្មៅ ដើម្បីចងអន្ទា ឡើងធ្វើការងារ សម្រាប់បម្រើពិធីបុណ្យ ប៉ុន្ដែពេលគេប្រើរួច ចម្រូងដែក ទាំងនេះ ក៏ត្រូវបានក្រុមជាង ដើរដកនិងប្រមូលយកចេញអស់ហើយ។

មន្ដ្រីសាលាខណ្ឌដូនពេញ បានបញ្ជាក់ ទៀតថា ចម្រូងដែកទាំងនេះ ក៏ត្រូវបានក្រុមជាងដាំ ដើម្បីចងប៉េង ប៉ោងបង្ហោះ ក្នុងព្រះរាជពិធីបុណ្យឡើងគ្រង រាជ្យសម្បត្ដិរបស់ព្រះមហាក្សត្រ កាលពីប៉ុន្មានថ្ងៃមុននេះ ដោយឡែកព័ត៌មាន ដែល ត្រូវបានគេផ្សព្វ ផ្សាយនិងបង្ហោះនៅលើបណ្ដាញទំនាក់ទំនងសង្គម ថា មានអ្នកត្រូវរបួសត្រង់ជើងនោះ មន្ដ្រីអះ អាងថា មិនច្បាស់នោះទេ ហើយក៏ មិនមានព័ត៌មានជាក់ស្ដែង ពីជនរងគ្រោះផងដែរ ។

មន្ដ្រីសាលាខណ្ឌដូនពេញ បានអំពាវនាវ ទៅកាន់ប្រជាពលរដ្ឋ ឈប់មានការព្រួយបារម្ភ និងមន្ទិលសង្ស័យតទៅទៀត ចំពោះចម្រូងដែក នៅតាមសួរច្បារមុខព្រះបរមរាជវាំង ពីព្រោះក្រុមការងារបានយកចេញអស់ហើយ៕

រូបភាព និងខ្លឹមសារ ដែលត្រូវបានគេបង្ហោះ នៅបណ្តាញទំនាក់ទំនងសង្គម Facebook