វ៉ាស៊ីនតោន៖ ប្រធានាធិបតីអាម៉េរិកលោក បារ៉ាក់ អូបាម៉ា នឹងធ្វើដំណើរទស្សនកិច្ចចំនួន ៣ថ្ងៃ ដោយថ្ងៃ ដំបូងត្រូវនឹងថ្ងៃទី១០ ខែវិច្ឆិកា លោកនឹងធ្វើដំណើរទៅកាន់ប្រទេសចិន ហើយក៏ ជាការឈានជើងដំបូង របស់លោកមកកាន់ទឹកដីអាស៊ីនេះដែរ បន្ទាប់មករូបលោក និងមកកាន់ប្រទេសមីយ៉ាន់ម៉ា និងអូស្រ្តាលី នៅ ក្នុងកិច្ចប្រជុំកំពូលជាបន្ដបន្ទាប់ រួមជាមួយព្រឹត្តិការណ៍អន្តរជាតិសំខាន់ៗផ្សេងទៀត។
ទីភ្នាក់ងារសារព័ត៌មានចិន ស៊ិនហួ ចេញផ្សាយថ្ងៃទី០៥ ខែវិច្ឆិកា ឆ្នាំ២០១៤ នេះឲ្យដឹងថា នៅក្នុងខណៈ ពេលដែលរូបលោកស្ថិតនៅក្នុងប្រទេសចិន លោកនឹងចូលរួមក្នុងកិច្ចប្រជុំ កំពូល មួយស្ដីពីកិច្ចសហ ប្រតិបត្តិការសេដ្ឋកិច្ចអាស៊ីប៉ាស៊ីហ្វិក ធ្វើឡើងក្នុងទីក្រុងប៉េកាំង និងជួបសំណេះសំណាលជាមួយនឹង លោកប្រធានាធិបតីចិន ស៊ី ជិនពីង។
លោកប្រធានាធិបតី នឹងធ្វើដំណើរទៅកាន់ទីក្រុងណៃពិដោ ប្រទេសមីយ៉ាន់ម៉ា នៅថ្ងៃទី១២ ខែវិច្ឆិកា និង ចូលរួមក្នុងព្រឹត្តិការណ៍ ដែលពាក់ព័ន្ធនឹងទំនាក់ទំនងសម្រាប់បណ្ដាប្រទេស អាស៊ីបូព៌ា និងកិច្ចប្រជុំកំពូល របស់អាស៊ីបូព៌ាផងដែរ។ លើសពីនោះទៀតលោកនឹងបើក កិច្ចពិភាក្សាទ្វេភាគីជាមួយនឹងប្រធានាធិបតី មីយ៉ាន់ម៉ាលោក ធេន សេន ផងដែរ៕
