លោក អូបាម៉ា និងលោកស្រី ស៊ូជី ចង់ឲ្យមីយ៉ាន់ម៉ា បង្កើនកំណែទម្រង់ ថែមទៀត

រ៉ង់ហ្គូន៖ ប្រធានាធិបតីអាម៉េរិក លោក បារ៉ាក់ អូបាម៉ា បានផ្តល់ការ វាយតម្លៃត្រង់ៗ ចំពោះកំណែ ទម្រង់ ឆ្ពោះទៅរកលទ្ធិប្រជាធិបតេយ្យ ទៅថ្ងៃមុខរបស់ប្រទេស មីយ៉ាន់ម៉ា ដោយរួមមានរឿង វិវាទជម្លោះសាសនា និងការ ហាមឃាត់មិនឲ្យ លោកស្រី អ៊ុងសាន ស៊ូជី ចូលរួមបោះឆ្នោតជ្រើសរើស ប្រធានាធិបតីជាដើម។

យោងតាមសារព័ត៌មានបាងកកប៉ុស្តិ៍ ចេញផ្សាយនៅថ្ងៃសុក្រ ទី១៤ ខែវិច្ឆិកា ឆ្នាំ២០១៤ បានឲ្យដឹងថា លោកស្រី ស៊ូជី ត្រូវបានដោះលែងឲ្យមាន សេរីភាព រយៈពេល ០៤ឆ្នាំកន្លងមកហើយ បន្ទាប់ពីរដ្ឋាភិបាលយោធាភូមាឃុំទុកក្នុងផ្ទះ អស់រយៈពេលជាង ២០ឆ្នាំ។

លោកស្រីគឺជាសមាជិកសភា មួយរូបរបស់មីយ៉ាន់ម៉ា ប៉ុន្តែលោកស្រីមិនអាចឈរឈ្មោះបោះឆ្នោតជ្រើសរើស ប្រធានាធិបតី នៅអាណត្តិក្រោយបាន ដោយសារតែច្បាប់ ក្នុងរដ្ឋធម្មនុញ្ញថ្មី បានរារំាងមិនឲ្យនរណាម្នាក់ ដែលមាន ស្វាមីភ័ក្ត្រខ្លំាងជាមួយបរទេស អាចឈរឈ្មោះបាន ហើយម្យ៉ាងទៀតលោកស្រី មានស្វាមី និងកូនប្រុសជា ជនជាតិអង់គ្លេសទៀត។

ជាមួយគ្នានោះដែរ លោក អូបាម៉ា ប្រធានាធិបតីអាម៉េរិក បាននិយាយនៅក្នុងសន្និសីទសារព័ត៌មាន នៅផ្ទះក្បែរមាត់ បឹង ដែលទីកន្លែងដែលលោកស្រីត្រូវឃុំខ្លួនថា «ខ្ញុំមិនយល់ចំពោះការរារំាងនរណាម្នាក់មិនឲ្យឈរឈ្មោះបោះឆ្នោតប្រធានាធិបតី ដោយសារតែកូនរបស់ពួកគេសោះ»៕