ភ្នំពេញ៖ កម្លាំងកងរាជអាវុធហត្ថរាជធានីភ្នំពេញ បានវែកមុខបណ្តាញចោរលួចរថយន្ត ដ៏សកម្មក្នុងរាជធានី ភ្នំពេញ ដោយឃាត់បានចោរ អ្នកចែកចាយ និងទិញផលចោរកម្មសរុប៣នាក់ និងដកហូតរថយន្តស៊េរីទំនើបៗ ចំនួន ៣គ្រឿង បន្ទាប់ពីបើកប្រតិបត្តិការស្រាវជ្រាវអស់រយៈពេល ៦ខែ។
ចោរដែលធ្វើសកម្មភាពលួច រួមនិងអ្នកចែកចាយ និងអ្នកទិញផលចោរកម្មត្រូវបានកម្លាំងកងរាជអាវុធហត្ថរាជធានី ភ្នំពេញ សហកាជាមួយកម្លាំងជំនាញការិយាល័យស្រាវជ្រាវ និងយុត្តិធម៌ នៃស្នងការដ្ឋានកងរាជអាវុធហត្ថលើផ្ទៃ ប្រទេស ស្រាវជ្រាវ និងឈានដល់ការចាប់ខ្លួនជាបន្តបន្ទាប់នាពេលថ្មីៗនេះ។
ឧត្តមសេនីទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជ ធានីភ្នំពេញ បានប្រាប់ឲ្យដឹងនៅព្រលប់ថ្ងៃអាទិត្យ ទី២៣ ខែវិច្ឆិកា ឆ្នាំ២០១៤នេះថា ដោយប្រកាន់ខ្ជាប់ស្មារតីគោ រព និងអនុវត្តតាមការដឹកនាំបញ្ជាយ៉ាងម៉ឹងម៉ាត់របស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធ ពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក្នុងការបង្កា បង្ក្រាប ទប់ស្កាត់រាល់បទល្មើស ដែលបង្កភាពវឹកវរ អសន្តិសុខ ដល់សង្គមជាតិ នោះកម្លាំងកងរាជអាវុធហត្ថរាជធានីភ្នំពេញ តែងតែបាន ចុះធ្វើការ តាមដាន ស៊ើបអង្កេតរាល់ករណីកើតមាននាពេលកន្លងទៅ មិនបណ្តោយឲ្យករណីចោរកម្មណាមួយស្ងប់ស្ងាត់ ដោយមិនស្រាវជ្រាវរកមុខក្រុមចោរនោះឡើយ។
លោកឧត្តមសេនីយ៍ទោ រ័ត្ន ស្រ៊ាង បន្តថា ក្រោយពីបានទទួលបណ្តឹងពីជនរងគ្រោះជាបន្តបន្ទាប់ ស្តីពីការបាត់រថ យន្ត រូបលោកបានដឹកនាំបញ្ជាផ្ទាល់ក្នុងកិច្ចប្រតិបត្តិការស្រាវជ្រាវ រកមុខសញ្ញាចោរលួចរថយន្តនេះ។
លោកឧត្តមសេនីយ៍ទោ រ័ត្ន ស្រ៊ាង បានឲ្យដឹងថា ជនសង្ស័យដែលឃាត់ខ្លួន មានល្បិចខ្ពស់ណាស់ក្នុងការលួច រថយន្ត ពួកគេតែងបានប្រើប្រាស់រូបភាពដាក់ពាក្យសុំចូលបម្រើការងារបើកបរឲ្យក្រុមហ៊ុនដោយប្តូរឈ្មោះ ជា ច្រើននៅពេលធ្វើតេស្តជាប់ត្រូវបានក្រុមហ៊ុនទទួលឲ្យបើកបររថយន្ត ពេលនោះពួកគេមានឱកាស លួចយករថ យន្តដោយមិនបាច់គាស់សោរ។
ជនសង្ស័យមានល្បិចខ្ពស់ក្នុងការគេចខ្លួន ត្រូវបានសមត្ថកិច្ចអាវុធហត្ថប្រើវិធានការជំនាញក្នុងការស្វែងរកអស់ រយៈពេល៦ខែ ទើបសម្រេចឈានដល់ការឃាត់ខ្លួនមានចំនួន ៣នាក់ ក្នុងនោះម្នាក់ជាអ្នកលួច, ម្នាក់ជាអ្នកចែក ចាយ និងម្នាក់ទៀត ជាអ្នកទិញផលចោរកម្ម។ ជនសង្ស័យរួមមាន៖ ១. ឈ្មោះ លឹម ពិសិដ្ឋ ហៅ ហេង ប៊ុនម៉េង ហៅ សុខ វណ្ណៈ ហៅ លី ចំរើន ភេទប្រុស អាយុ ២៨ឆ្នាំ មុខរបរមិនពិតប្រាកដ ឃាត់ខ្លួននៅរាជធានីភ្នំពេញ (អ្នកលួច)។ ២. ឈ្មោះ ផុន កេង ហៅ ត្រេន ភេទប្រុស អាយុ ៣៥ឆ្នាំ មុខរបរមិនពិតប្រាកដ ឃាត់ខ្លួននៅខេត្ត បាត់ដំបង (អ្នកចាត់ចែងលក់បន្ត) និងទី៣- ឈ្មោះ កែវ ស៊ីថៃ ភេទប្រុស អាយុ ២៥ឆ្នាំ ឃាត់ខ្លួននៅខេត្តកំពង់ស្ពឺ (អ្នកទទួលទិញ)។
តាមចម្លើយសារភាពរបស់ជនសង្ស័យ លឹម ពិសិដ្ឋ បានឲ្យដឹងថា រូបគេធ្លាប់បានប្រើល្បិចប្តូរឈ្មោះផ្សេងៗ ជាអ្នក បើកបររថយន្តឲ្យក្រុមហ៊ុន ហើយលួចយករថយន្តបានចំនួន ៧គ្រឿង ជាបន្តបន្ទាប់។
ជាមួយការឃាត់ខ្លួននេះ សមត្ថកិច្ចដកហូតរថយន្ត ដែលជាវត្ថុតាងបានចំនួន៣គ្រឿង ១. ម៉ាក BMW X6 ពណ៌ ទឹកប្រាក់ ស៊េរីឆ្នាំ២០១៤, ២. ម៉ាក TOYOTA TACOMA ពណ៌ទឹកប្រាក់ ស៊េរីឆ្នាំ២០០៦, ៣. ម៉ាក TOYOTA VIGO ពណ៌ទឹកមាស ស៊េរីឆ្នាំ២០១៤។
ឧត្តមសេនីយ៍ទោ រ័ត្ន ស៊្រាង ដែលធ្លាប់ទទួលបានការកោតសរសើរច្រើនពីប្រជាពលរដ្ឋ ក្នុងប្រតិបត្តិការរក្សាសន្តិ សុខជូនប្រជាពលរដ្ឋនោះ ក៏បានបញ្ជាក់បន្ថែមថា ប្រតិបត្តិការនេះ ក៏ទទួលបានការចូលរួមសហកា ពីកងរាជអាវុធ ហត្ថខេត្តបាត់ដំបង ខេត្តកំពង់ស្ពឺ ខេត្តសៀមរាប និងខេត្តកំពង់ធំផងដែរ។ ចំពោះមុខសញ្ញាបក្ខពួកជនសង្ស័យ និងវត្ថុតាង ដែលនៅសេសសល់ សមត្ថកិច្ចបាននិងកំពុងស្រាវជ្រាវបន្តទៀត៕
