កំពង់ឆ្នាំងៈ បុរសម្នាក់បានស្លាប់បាត់បង់ជីវិត នៅហ្នឹងកន្លែងកើតហេតុ ក្នុងឧប្បត្តិហេតុគ្រោះថ្នាក់ ចរាចរណ៍ ដោយរថយន្តវីហ្គោ បុកពេញទំហឹងខណៈ ជិះម៉ូតូឆ្លងផ្លូវ កាលពីវេលាម៉ោង ៣ និង ៥៥នាទី រសៀលថ្ងៃទី២៦ ខែវិច្ឆិកា ឆ្នាំ២០១៤ នៅលើកំណាត់ផ្លូវជាតិលេខ៥ ស្ថិតក្នុងភូមិថ្នល់ទទឹង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ។
លោក ហ៊ុល វាសនា អធិការនគរបាលស្រុកកំពង់ត្រឡាច បានអោយដឹងថា ជនរងគ្រោះឈ្មោះ ប៉ឹម កុសល ភេទប្រុស អាយុ៥៨ឆ្នាំ រស់នៅភូមិតាលកក្រោម ឃុំកោះថ្កូវ ស្រុកេជលគិរី ខេត្តកំពង់ឆ្នាំង ខណៈជិះម៉ូតូម៉ាកវ៉េវអាល់ហ្វា អត់ស្លាកលេខ ឆ្លងថ្នល់បំរុងទៅផ្ទះ ក៏ត្រូវរថយន្តវីហ្គោ បុកពេញមួយទំហឹង បណ្តាល អោយជនរងគ្រោះ ស្លាប់បាត់បង់ជីវិត នៅហ្នឹងកន្លែងកើតហេតុ រីឯរថយន្តពេលឃើញដូច្នេះ ក៍បន្ថែមល្បឿនបើករត់គេច សំដៅទៅកាន់ស្រុកទឹកផុស បាត់ស្រមោលតែម្តង ។
ក្រោយកើតហេតុសពជនរងគ្រោះ ត្រូវបានប្រគល់ជូនក្រុមគ្រួសារ យកទៅចាត់ចែងធ្វើបុណ្យតាមប្រពៃណី ហើយ សមត្ថកិច្ចកំពុង តែស្រាវជ្រាវរករថយន្តបង្ក ដើម្បីមកដោះស្រាយ តាមផ្លូវច្បាប់ ៕
