ភ្នំពេញ៖ ស្ថានទូតនៃសាធារណរដ្ឋកូរ៉េ (កូរ៉េខាងត្បូង) និងមហោស្រពភាពយន្តអន្តរជាតិ កម្ពុជាលើកទី៥ បាន សហការគ្នារៀបចំកម្មវិធី ចាក់បញ្ចាំងខ្សែភាពយន្ត ចាប់ពីថ្ងៃទី៦ ដល់ថ្ងៃទី១០ ខែធ្នូ ឆ្នាំ២០១៤ ដែលផ្តោតសំខាន់ ទៅលើខ្សែភាពយន្តកូរ៉េ។
កម្មវិធីនេះចាក់បញ្ចាំង ៥រឿង គឺរឿងមនុស្សចចក, សត្វកំណាច, គ្រួសារវិលវិញ, ដោះលែងខ្ញុំទៅ និង រឿងរបាំង មុខ។ រឿងទាំងនោះនឹងបង្ហាញពីភាពសម្បូរបែប និង រស់រវើកនៃភាពយន្តកូរ៉េ អនុភាពដែលកើតចេញពីបច្ចេក ទេស ការចងក្រងសាច់រឿងដោយផ្អែកលើប្រវត្តិសាស្ត្រ ភាពប៉ិនប្រសព្វរបស់តារាសំដែង និងឆ្លុះបញ្ចាំងពីតថភាព សង្គម។
កម្មវិធីនេះសម្ពោធបើកគឺប្រព្រឹត្តទៅនៅម៉ោង ៦ល្ងាច ថ្ងៃទី៦ ខែធ្នូ ឆ្នាំ២០១៤ នៅរោងកុន Major Cineplex ផ្សារ ទំនើបអ៊ីអន ដោយមានការចូលរួមពីលោកឯកអគ្គរដ្ឋទូតនៃសាធារណរដ្ឋកូរ៉េ (កូរ៉េខាងត្បូង) និងលោកស្រី ភឿង សកណា រដ្ឋមន្ត្រីនៃក្រសួងវប្បធម៌ និង វិចិត្រសិល្បៈ (កម្ពុជា)។
រឿងដែលចាក់បញ្ចាំងដំបូងគេមានចំណងជើងថា «មនុស្សចចក» ដែលជារឿងមនោសញ្ចេតនាបរិសុទ្ធ លាយឡំ នឹងដំណើររឿងដ៏គួរឲ្យចាប់អារម្មណ៍របស់មនុស្សចចក។ ជាងនេះទៅទៀត ការតាំងពិព័រណ៍រួបថតអំពីភាពយន្ត កូរ៉េ ក៏បានដាក់តាំងបង្ហាញនៅផ្សារទំនើបអ៊ីអន ផ្លាស្សា ខាងលិច (ជាន់ទី១)។ បន្ថែមទៅលើរឿងទាំង៥ ដែលបាន រៀបរាប់ចំណងខាងលើរួចហើយ ក៏មាន៥រឿងផ្សេងទៀត៖ រថភ្លើងលើទឹកកក, រលកយក្ស, អាថ៌កំបាំងទីក្រុងប៊ែក ឡាំង, ក្ដីសង្ឃឹម និងបន្ទប់រៀនស្ថាបត្យកម្ម ១០១ ដើម្បីបង្ហាញពីភាពសម្បូរបែបនៃភាពយន្តកូរ៉េ។
លោកស្រីជាជនជាតិកូរ៉េ ដែលទទួលចាត់ចែងកម្មវិធីនេះ បានប្រាប់អ្នកសារព័ត៌មានជាច្រើនអង្គភាព ក្នុងឱកាស ជួបជុំពិសារអាហារថ្ងៃត្រង់ កាលថ្ងៃអង្គារ ទី២ ខែធ្នូ ឆ្នាំ២០១៤ ម៉ោង១២ ថ្ងៃត្រង់ នៅភោជនីយដ្ឋានឡឺសេអួល (ម្ហូបកូរ៉េ) បានឲ្យដឹងបន្ថែមថា កន្លងមកការផ្សព្វផ្សាយផ្នែកសិល្បៈទី៧ នៅកម្ពុជា ពុំទាន់មានភាពទូលំទូលាយនៅ ឡើយ ទើបនៅពេលនេះរៀបចំឲ្យមានកម្មវិធីនេះឡើង ក្នុងបំណងឲ្យប្រជាជនខ្មែរ ស្គាល់វប្បធម៌បរទេសផ្សេងៗ ឲ្យបានច្រើន។
សូមបញ្ជាក់ថា កម្មវិធីនេះមានលក្ខណៈពិសេស ពីព្រោះ មានការសហការរៀបចំដ៏សកម្មរបស់ស្ថានទូតកូរ៉េខាង ត្បូង ដោយមានការជ្រើសរើសខ្សែភាពយន្តទៅជាការរៀបចំតាំងពិព័រណ៍ ហើយត្រូវបានយកមកជំនួសមហោស្រព ភាពយន្តកូរ៉េប្រចាំឆ្នាំ ដែលរៀបចំដោយស្ថានទូតកូរ៉េរយៈពេល ៧ឆ្នាំមកហើយ។ រឿងចាក់បញ្ចាំងទាំងនោះទទួល បានការវាយតម្លៃកំរិតអន្តរជាតិ និងទទួលស្គាល់យ៉ាងទូលំទូលាយថាជាភាពយន្តមានស្តង់ដារខ្ពស់រកចំណូលបាន ច្រើន៕
