រតនគិរី ៖ គេតែងតែសង្កេតឃើញ រថយន្ត និងម៉ូតូជាច្រើនគ្រឿង សម្រុកដឹកឈើប្រណីត ចូលទីតាំងស្តុកឈើមួយកន្លែង ស្ថិតក្នុងភូមិថ្មដារ សង្កាត់បឹងកន្សែង ក្រុងបានលុង ខេត្តរតនគិរី ប៉ុន្តែមិនត្រូវបានបង្រ្កាប ដោយជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធនោះឡើយ។
បើតាមប្រជាពលរដ្ឋ ដែលមានលំនៅឋានក្បែរកន្លែងស្តុកឈើនេះ ប្រាប់ឲ្យដឹងថា ថៅកែឈើនេះជាជនជាតិវៀតណាម មកជួលទីតាំងសម្រាប់ទិញឈើប្រណីត ដើម្បីដឹកទៅលក់នៅប្រទេសវៀតណាម។
ប្រជាពលរដ្ឋខាងលើ ប្រាប់បន្តថា ក្រុមឈ្មួញវៀតណាមទាំងនេះ មិនខ្លាចច្បាប់ទម្លាប់ស្រុកខ្មែរនោះទេ ដោយពួកគេសំអាងលើ អំណាចទឹកលុយ ទិញទឹកចិត្ត សមត្ថកិច្ចជំនាញ និងសមត្ថកិច្ចពាក់ព័ន្ធ ភ្លេចអនុវត្តការងារ ដែលថ្នាក់លើប្រគល់ជូន។ ការដឹកជញ្ជូនឈើពីសំណាក់ក្រុមឈ្មួញខ្មែរ យកមកលក់ឲ្យក្រុមឈ្មួញ វៀតណាមនេះ ភាគច្រើនប្រព្រឹត្តទៅនៅពេលយប់ លើកដាក់ឈើឮសូរក្តុងក្ឌាំង រកតែដេកពួនមិនបាន ថែមទៀតផង។ ទាក់ទិនទៅនឹងក្រុមឈ្មួញវៀតណាម បើកទីតាំងទិញឈើ ប្រណីតខុសច្បាប់កណ្តាលក្រុងបានលុង ដើម្បីយកទៅលក់នៅវៀតណាម ដោយគ្មានការបង្រ្កាបនេះដែរ មជ្ឈមណ្ឌលព័ត៌មានដើមអម្ពិល មិនអាចសុំការបំភ្លឺណាមួយពីលោក ហុង វណ្ណរាន នាយផ្នែករដ្ឋបាលព្រៃឈើ ទទួលបន្ទុកក្រុងបានលុង ស្រុកលំផាត់ និងស្រុកកូនមុំ បានទេ នៅរសៀលថ្ងៃទី៣ ខែមករា ឆ្នាំ២០១៥ នេះ៕
