បាត់ដំបង៖ កម្លាំងនគរបាល ការិយាល័យប្រឆាំងគ្រឿងញៀនខេត្ត បានឃាត់ខ្លួនជនសង្ស័យម្នាក់ កាលពីវេលាម៉ោង២និង៥៦នាទី ព្រឹកថ្ងៃទី៥ ខែមីនា ឆ្នាំ២០១៥ ពីបទចែកចាយថ្នាំញៀន នៅចំណុចក្រុមទី៨ ភូមិវត្តតាមមិម ឃុំអូរដំបង ស្រុកសង្កែ ខេត្តបាត់ដំបង រួចកសាងសំណុំរឿង បញ្ជូនខ្លួនទៅតុលាការខេត្ត ដើម្បីចាត់ការបន្តតាមច្បាប់។
លោក ស៊ាន សូណាល់ នាយរងការិយាល័យ ប្រឆាំងគ្រឿងញៀនខេត្ត បានឲ្យដឹងថា ជនសង្ស័យដែលសមត្ថកិច្ចឃាត់ខ្លួនបាន មានឈ្មោះ ប៉ាន ស៊ីថា ភេទប្រុស អាយុ៣២ឆ្នាំ មានទីនៅចំណុចក្រុមទី៨ ភូមិវត្តតាមមិម ឃុំអូរដំបង ស្រុកសង្កែ ខេត្តបាត់ដំបង ព្រមទាំងរឹបអូស បានថ្នាំញៀនម៉ាទឹកកក ១ថង់តូច មានទម្ងន់ស្មើនិង ០.៥២ក្រាម នាំយកមកការិយាល័យជំនាញដើម្បីសាកសួរ។ ជនសង្ស័យបានឆ្លើយសារភាពថា ខ្លួនពិតជាបានរកស៊ី ចែកចាយថ្នាំញៀនពិតប្រាកដមែន។
បច្ចុប្បន្នសមត្ថកិច្ចការិយាល័យជំនាញ បានកសាងសំណុំរឿងបញ្ជូនខ្លួនជនសង្ស័យ ទៅតុលាការខេត្ត នៅព្រឹកថ្ងៃទី៦ ខែមីនា ឆ្នាំ២០១៥នេះ ដើម្បីចាត់ការបន្តតាមច្បាប់៕
