ចាប់ខ្លួនមន្រ្តី ក្រសួងព័ត៌មាន ពីបទប្រើប្រាស់ ស្លាកលេខ និងឯកសណ្ឋាន នគរបាលក្លែងក្លាយ

កណ្តាល៖ សមត្ថកិច្ចខេត្តកណ្តាល បានឱ្យដឹងថា នៅរសៀលថ្ងៃទី០៧ ខែមីនា ឆ្នាំ២០១៥នេះ កម្លាំងសមត្ថកិច្ច ចម្រុះបានឃាត់ខ្លួន បុរសម្នាក់ជាមន្រ្តីនៅក្រសួង ដែលបានបន្លំប្រើប្រាស់ស្លាកលេខរថយន្ត និង ឯកសណ្ឋាន នគរបាលក្លែងក្លាយ ។

ការឃាត់ខ្លួននេះ បានធ្វើឡើង នៅចំណុចកំពង់សាឡាងអ្នលឿង ត្រើយខាងលិច ស្ថិតនៅក្នុង ភូមិកំពង់ចំលង ឃុំព្រែកទន្លាប់ ស្រុកលើកដែក ខេត្តកណ្ដាល។ បើតាមសមត្ថកិច្ចបានឱ្យដឹងថា ជនល្មើស ឈ្មោះ អូន ភាព អាយុ៤៧ឆ្នាំ នៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ជាអ្នកថតរូបនៅ ក្រសួងព័ត៌មាន ។

ប្រតិបត្តិការនេះ សមត្ថកិច្ច ក៏បានដកហូតវត្ថុតាងមួយចំនួន រួមមាន រថយន្តកាម៉ារីបាឡែន ពណ៌ខ្មៅ ស្លាកលេខ នគរបាល 2-7272 មួយគ្រឿង ជារថយន្តគេចពន្ធ , អាវុធខ្លី ប៉េអាម៉ាប់ ចំនួន០១ដើម គ្រាប់ចំនួន.០៥គ្រាប់ និងបង់០១, លុយដុល្លារចំនួន.៩០០ដុល្លារ, លុយរៀល៦.៨០០រៀល រួមជាមួយវត្ថុតាំងមួកនគរបាល មួកយោធា និងអាវនគរបាលពណ៌សដៃវែង ពាក់សិក្ត៣. ចំនួន១ផងដែរ៕