ភ្នំពេញ ៖ ម៉ូតូមួយគ្រឿង រងការខូចខាតទាំងស្រុង និងរថយន្តពីរគ្រឿង ក៏ត្រូវរងការខូចខាត យ៉ាងដំណំ ដោយសាររថយន្ត លុច្យស៊ីសតូចមួយគ្រឿងបើកបរ ដោយនិស្សិតស្រីម្នាក់ បានជ្រុលទៅបុកយ៉ាងពេញទំហឹង កាលពីរសៀលថ្ងៃទី៩ខែមីនា ឆ្នាំ២០១៥ ស្ថិតនៅតាមបណ្តោយផ្លូវសព័ន្ធរុស្ស៊ី ខាងមុខព្រលានយន្តហោះ អន្តរជាតិពោធិ៍ចិនតុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
នគរបាលបានឲ្យដឹងថា រថយន្តបង្កម៉ាកលុច្យស៊ីសតូច ពណ៌ស ពាក់ស្លាកលេខ ភ្នំពេញ 2Q-8533 បើកបរដោយយុវសិស្សម្នាក់ ឈ្មោះ គង់រ៉េត បីនីកា ភេទស្រី អាយុ២៣ឆ្នាំ ជាសិស្សរៀននៅសាលាអេស៊ីអ៊ី ចំណែកឯរថយន្តរងគ្រោះវិញ រថយន្តម៉ាកកាមរីឆ្លាម ពណ៌ស ជាប្រភេទរថយន្តរត់តាក់ស៊ី ដឹកភ្ញៀវនៅព្រលាន យន្តហោះ អន្តរជាតិពោធិ៍ចិនតុង អ្នកបើកបរពុំត្រូវបានគេស្គាល់ឈ្មោះទេ និងរថយន្តមួយគ្រឿងទៀត គ្រាន់តែរងការខូចបន្តិចបន្តួច រួចក៏ចេញដំណើរទៅបាត់ ចំណែកឯម៉ូតូមួយគ្រឿងទៀត ម៉ាកសង់កូរ៉េ រងការខូចខាតទាំងស្រុងតែម្តង អ្នកបើកបរពុំត្រូវបានគេ ស្គាល់ឈ្មោះទេ រងរបួសធ្ងន់។
ប្រភពបានបន្តថា មុនពេលកើតហេតុ គេឃើញរថយន្តបង្កបើកបរ ក្នុងទិដៅពីលិចទៅ កើតលុះដល់ចំណុចកើតហេតុ រថយន្តបង្កបានបើកប្រជែង រថយន្តមួយគ្រឿទៀត ដែល នៅពីខាងមុខរបស់គេ ក្នុងទិសដៅស្របទិសគ្នា ក៏បានជ្រុលទៅបុក និងម៉ូតូមួយគ្រឿង ដែលបើកបរច្រាសទិសគ្នា រួចក៏ជ្រុលទៅបុករថយន្តពីរគ្រឿងទៀត រួចអូសម៉ូតូហួសទៅ បុកដើមឈើនៅក្បែរចិញ្ចើមគៀបជាប់ រុញម៉ូតូធ្លាយចូលក្នុងរបងសង្ក័សីគេផងដែរ ។
ប្រភពបានបន្តថា ក្រោយពេលកើតហេតុ នគរបាលបានចុះទៅដល់ដើម្បីអន្តរាគមន៍ និងបានហៅរថយន្តសង្គ្រោះ មកដឹកជនរងគ្រោះទៅកាន់មន្ទីរពេទ្យ ដើម្បីព្យាបាលជាបន្ទាន់ ចំណែកឯវត្ថុតាង ត្រូវយកទៅរក្សារទុកនៅអធិការដ្ឋាន ខណ្ឌពោធិ៍សែនជ័យ ដើម្បីរង់ចាំដោះស្រាយ គ្នាជាក្រោយ៕
