បាត់ដំបងៈយុវជន២នាក់ របួសធ្ងន់បាក់ភ្លៅសន្លប់ភ្លាមៗដោយសារ រថយន្ដកាមរីឆ្លាម១គ្រឿង ពណ៌កណ្ដុរ ប្រមេះ ឆ្នាំ១៩៩៨ ពាក់ស្លាកលេខ បាត់ដំបង2A-5260 បើកក្នុងល្បឿនលឿនជ្រុលបុកជាមួយនឹងម៉ូតូC125 ពាក់ ស្លាកលេខ1C-9663 ពេញមួយទំហឹង កាលពីវេលាម៉ោង៩ និង៣០នាទី ថ្ងៃទី០៨ ខែកញ្ញា ឆ្នាំ២០១២ នៅ ចំណុច ធនាគារជាតិកម្ពុជា សាខាបាត់ដំបងស្ថិតក្នុង ភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ចំណែកអ្នកបើកបររថយន្ដ បន្ទាប់ពីបង្កគ្រោះថ្នាក់ បានគេចខ្លួនបាត់។
ប្រភពពីកន្លែងកើតហេតុបានឲ្យដឹងថា ជនរងគ្រោះជិះម៉ូតូមានគ្នា២នាក់ រងរបួសធ្ងន់ ទី១ឈ្មោះ វាត់ សារួន ភេទប្រុស អាយុ១៧ឆ្នាំ រស់នៅភូមិដូនទាវ ឃុំពាមឯក ស្រុកឯកភ្នំ បាក់ភ្លៅខាងស្ដាំ ធ្លាក់បោកនឹងថ្នល់ បែក ក្បាលសន្លប់ភ្លាមៗ នៅកន្លែងកើតហេតុ ទី២ឈ្មោះ រិទ្ធ បូរស្មី ភេទប្រុស អាយុ១៨ឆ្នាំ រស់នៅភូមិវត្តរំដួល សង្កាត់ ចំការសំរោង ក្រុងបាត់ដំបង បាក់ភ្លៅខាងស្ដាំ ប្លោងទៅបុករបង ធនាគារក្រហមជាតិកម្ពុជា សន្លប់ ភ្លាមៗដូច គ្នា។
សាក្សីនៅកន្លែងកើតហេតុឲ្យដឹងថា ករណីគ្រោះថ្នាក់ចរាចរណ៌ខាងលើនេះគឺ បណ្ដាល មកពីរថយន្ដកាមរីឆ្លាម ដែលបើកបរដោយស្ត្រីម្នាក់ មិនស្គាល់ឈ្មោះអាយុប្រហែល៤២ឆ្នាំ ស្ថិតនៅភូមិទួលតាឯក សង្កាត់ទួលតាឯក ក្រុងបាត់ដំបង ដែលបើកបរក្នុងល្បឿនលឿន ចេញពីស្ពាន ស ខេង លុះមកដល់កន្លែងកើតហេតុ ក៏ទៅបុកម៉ូតូ យុវជន២នាក់តាម ផ្លូវលេខ៣ ពីផ្សារលើមកផ្សារណាត់រងគ្រោះត្រូវចំជើង និងម៉ូតូពេញមួយទំហឹងប្លោងយុវជន ទាំង២ ទៅលើកញ្ចក់ដំបូលរថយន្ដ លាន់ឮយ៉ាងខ្លាំង ហើយរថយន្ដបង្ក បន្ដទៅបុក របងធនាគារក្រហមជាតិ កម្ពុជា បាក់ខ្ទេចខ្ទីទើបឈប់ ចំណែកជនរងគ្រោះទាំង២នាក់ធ្លាក់ ចេញពីលើដំបូលរថយន្តបោកក្បាលនឹងថ្នល់ សន្លប់បាត់មាត់ភ្លាមៗ ហើយស្ត្រីដែលជាអ្នកបើកបរចុះពីរថយន្ដដឹកដៃកូនតូច និងក្មេងស្រីម្នាក់ឡើងជិះម៉ូតូឌុប គេចខ្លួនបាត់។
ក្រោយពីកើតហេតុ សមត្ថកិច្ចនគរបាលចរាចរណ៍ខេត្ត បានចុះទៅវាស់វែង និងធ្វើកំណត់ហេតុ រួចជួយដឹកជន រងគ្រោះទៅសង្គ្រោះបន្ទាន់នៅមន្ទីរពេទ្យឯកជន សុវណ្ណ។ ចំណែករថយន្ដបង្កត្រូវបាន កម្លាំងនគរបាល ចរា ចរណ៍ខេត្ត ស្ទួចយកទៅរក្សាទុក នៅការិយាល័យ ចរាចរណ៍ជើងគោកខេត្ត រង់ចាំម្ចាស់មកដោះស្រាយតាមផ្លូវ ច្បាប់៕
