ស្វាយរៀងៈ ក្នុងរយៈពេលប៉ុន្មានថ្ងៃកន្លងមកនេះ ខេត្តស្វាយរៀងមានភ្លៀងធ្លាក់ជោកជាំ នៅតាមស្រុក នានា របស់ខេត្តនេះ ធ្វើឲ្យប្រជាកសិកនាំគ្នាត្រេកអរ និងលែងព្រួយបារម្ភពីការខ្វះខាតទឹកសម្រាប់បង្ក បង្កើនផលទៀតហើយ។
លោក ថាច់ រតនា ប្រធានមន្ទីរកសិកម្មខេត្តស្វាយរៀង បានប្រាប់ឲ្យដឹងថា ស្រុកមួយចំនួនដែលជួបនូវ គ្រោះស្ងួតពីមុននោះ ឥឡូវនេះប្រជាកសិករ នៅទីនោះលែងខ្វះទឹកធ្វើស្រែទៀតហើយ ដោយសាររយៈ ពេលប៉ុន្មានថ្ងៃមកមានភ្លៀងធ្លាក់ស្ទើរតែគ្រប់ស្រុក ដោយមានស្រុកខ្លះភ្លៀងច្រើនពេកទៅធ្វើឲ្យប្រជា ពលរដ្ឋនាំគ្នាបូមទឹកចេញវិញក៏មាន។
លោកបានថ្លែងថា «គ្រោះរាំងស្ងួតលែងមានហើយនៅក្នុងខេត្តស្វាយរៀង ដោយបច្ចុប្បន្ននេះ ប្រជាកសិ ករកំពុងតែមមាញឹកគ្រប់ៗគ្នាក្នុងការដកស្ទូង»។
កន្លងមកខេត្តស្វាយរៀងបានជួបនៅភាពរាំងស្ងួតគួរឲ្យព្រួយបារម្ភ ដែលក្នុងនោះស្រុក២ ក្រុង១ នៅក្នុង ចំណោមក្រុង២ និងស្រុក៦ របស់ខេត្តនេះ បានជួបនៅគ្រោះរាំងស្ងួតធ្ងន់ធ្ងរជាងគេ គឺស្រុកស្វាយទាប ស្រុកកំពង់រោទិ៍ និងក្រុងបាវិត ក៏ប៉ុន្តែអំណោយផលពីធម្មជាតិក្នុងរយៈពេលប៉ុន្មានថ្ងៃនេះ វាបានផ្ដល់ក្ដី សង្ឃឹមសាជាថ្មីដល់ប្រជាកសិករដែលនាំគ្នាធ្វើស្រែពឹងលើមេឃនោះឲ្យមានក្ដីសង្ឃឹមឡើងវិញផងដែរ។
បើតាមលោកប្រធានមន្ទីរកសិកម្មខេត្តស្វាយរៀងលោក ថាច់ រតនា បច្ចុប្បន្ននេះ នៅក្នុងខេត្តស្វាយរៀង ទាំងមូល បង្កបង្កើនផលបានប្រមាណជា ៨៤ភាគរយហើយនៅលើផ្ទៃដីសរុប ហើយដោយសារតែមាន ភ្លៀងធ្លាក់ស្ទើរតែរាល់ថ្ងៃនេះ វាអាចនិងធ្វើឲ្យប្រជាពលរដ្ឋបង្កបង្កើនផលបាន ១០០ភាគរយក្នុងពេលដ៏ខ្លី ខាងមុខនេះ ជាក់ជាពុំខាន៕
