ព្រះសីហនុ៖ ក្រោយពីលោក ហ៊ុន ភី ប្រកាសឡើងធ្វើជា ប្រធានមន្ទីរដែនដីនគរូបីយកម្ម សំណង់ និងសុរិយោដី ខេត្ត ព្រះសីហនុ ជំនួសលោក សូ សុខ ភ្លាម ក៏មានការសំរុកស៊ីញ៉េចេញប្លង់កម្មសិទ្ធិដី សាធារណៈរបស់រដ្ឋមិន ប្រក្រតីជាច្រើនដូចជា ដីតំបន់បឹងព្រែកទប់បំពានលើ សជណ និងលិខិតរបស់រដ្ឋមន្រ្តី អ៊ឹម ឈុនលឹម ព្រមទាំង ដីចិញ្ចើមផ្លូវសាធារណៈ សម្រាប់ធ្វើសួនច្បារ។
មជ្ឈដ្ឋានទូទៅបាននិយាយថា លោក ហ៊ុន ភី សព្វថ្ងៃ ធ្វើការតាមតែខ្សែញាក់របស់អ្នកមានអំណាចក្នុង ខេត្តព្រះ សីហនុ និងតាមអំណាចទឹកប្រាក់តែប៉ុណ្ណោះ ដោយរូបគាត់ មិនខ្លាចប្រឈមមុខចំពោះច្បាប់សោះឡើយ។
ក្នុងនោះអ្វីដែលចាប់អារម្មណ៍ជាងគេ គឺដីនៅតំបន់បឹងព្រែកទប់ ស្ថិតក្នុងភូមិ១ សង្កាត់លេខ៣ ក្រុងខេត្តព្រះសីហនុ ដែលជាបឹងធម្មជាតិទឹកសាបសំរាប់អ្នកក្រុងព្រះសីហនុប្រើប្រាស់ តាំងពីដូនតាមក ដែលមាន ស.ជ.ណ. ការពារ ចេញដោយរាជរដ្ឋាភិបាល និងលិខិតលេខ ៥៤២ ដ.ន.ស/អ.ស.ភ ចុះថ្ងៃទី២៧ ខែមីនា ឆ្នាំ២០១៤ របស់លោក អ៊ឹម ឈុនលឹម រដ្ឋមន្រ្តីក្រសួងដែនដី នគរូបនីយកម្ម និងសំណង់ ដែលបានផ្ញើជូនលោក ស្បោង សារ៉ាត អភិបាលខេត្ត ព្រះសីហនុ ដែលមានកម្មវត្ថុស្តីអំពី ករណីការចុះបញ្ជីចេញបណ្ណកម្មសិទ្ធិ ជូនប្រជាពលរដ្ឋនៅតំបន់ បឹងព្រែកទប់ ដែលមានខ្លឹមសារថា បន្ទាប់ពីចុះធ្វើការពិនិត្យ ស្រាវជ្រាវឃើញថា ការចុះបញ្ជី ចេញបណ្ណកម្មសិទ្ធិ នៅតំបន់បឹង ព្រែកទប់ ស្ថិតនៅភូមិ១ សង្កាត់លេខ៣ ក្រុងខេត្តព្រះសីហនុ កន្លងមក នៅពុំទាន់ច្បាស់លាស់អំពីចំនួនគ្រួសារ ចំនួនក្បាលដី ការកំណត់តំបន់ការពារ និងតំបន់សម្រាប់ហេដ្ឋា រចនាសម្ព័ន្ធដែលអាចបង្ក បញ្ហាស្មុគស្មាញ ទៅថ្ងៃមុខ។
ដើម្បីជៀសវាងនូវបញ្ហាខាងលើ ក្រសួងរៀបចំដែនដី នគរូបនីយកម្ម និងសំណង់ ស្នើសុំអភិបាលខេត្ត និងជា ប្រធាន គណៈកម្មាធិការគ្រប់គ្រងដីរដ្ឋនៃខេត្តព្រះសីហនុ ធ្វើការផ្សព្វផ្សាយឲ្យបានទូលំទូលាយ អំពីការចុះបញ្ជី ដីធ្លីនៅតំបន់បឹងព្រែកទប់ ជូនប្រជាពលរដ្ឋដែលទទួលបានសិទ្ធិតាមរយៈ លិខិតលេខ ៤៩៨ស.ឧស ចុះថ្ងៃទី១១ ខែឧសភា ឆ្នាំ២០១២ របស់ទីស្តីការគណៈរដ្ឋមន្រ្តី និងអ្នកពាក់ព័ន្ធដោយអនុវត្តតាម នីតិវិធីចុះបញ្ជីបំពេញបន្ថែម ជាកញ្ចប់ក្នុងពេលតែមួយឲ្យបានគ្រប់ក្បាលដីទាំងអស់ ព្រមទាំងបង្ហាញក្បាលដីដែលបានចុះបញ្ជី បំពេញ បន្ថែមកន្លងមក ដោយធ្វើការបិទផ្សាយជាសាធារណៈ នូវប្លង់សុរិយោដី និងបញ្ជីឈ្មោះម្ចាស់ដីឲ្យបានទូលំទូលាយ ដើម្បីឲ្យអ្នកមានផលប្រយោជន៍ពាក់ព័ន្ធធ្វើការតវ៉ា។
តាមរយៈលិខិតរបស់លោករដ្ឋមន្រ្តី អ៊ឹម ឈុនលឹម នេះចេញបានតែ១សប្តាហ៍ ស្រាប់តែនៅថ្ងៃទី៤ ខែមេសា ឆ្នាំ ២០១៤ លោក ហ៊ុន ភី បំពានចុះហត្ថលេខា ចេញប្លង់កម្មសិទ្ធិដីសាធារណៈរបស់រដ្ឋ ឲ្យអ្នកមានអំណាច និងឈ្មួញ អ្នកមានប្រាក់ ដោយមិនបានធ្វើទៅតាមនីតិវិធីដែលលោករដ្ឋមន្រ្តីបានណែនាំនោះឡើយ។
ដូចនេះមហាជននៅខេត្ត ព្រះសីហនុ គិតថា លិខិតរបស់លោករដ្ឋមន្រ្តី គឺជាលិខិតឥតន័យ និងគ្មានតំលៃទាល់តែ សោះ សូម្បីឋានៈត្រឹមប្រធានមន្ទីរនៅតាមខេត្តសោះ ក៏មិនគោរពតាមថ្នាក់លើរបស់ខ្លួនដែរ។ ចំណែកលោក ហ៊ុន ភី ប្រជាពលរដ្ឋនិយាយថា បើសិនអ្នកស្រឡាញ់យុត្តិធម៌ គិតប្រយោជន៍សាធារណជាធំ សើរើកណីនេះឡើងវិញ លោក ហ៊ុន ភី ពិតជា ប្រឈមមុខនឹងច្បាប់ជាមិនខាន។ដំណឹងអំពីការបែកធ្លាយនៃការស៊ីញ៉េ ចេញបណ្ណកម្មសិទ្ធិ នៅតំបន់បឹងព្រែកទប់នេះ ត្រូវបានគេទំលាយឲ្យដឹងកាលពីថ្ងៃទី៤ ខែឧសភា ឆ្នាំ២០១៤ម្សិលម៉ិញនេះ។
បន្ទាប់ពីឃើញមានការសំរុក ចាក់ដីចូលបឹងព្រែកទប់នៅដីមួយកន្លែងដែលក្រុមអ្នកស៊ីឈ្នួលចាក់ដី បានបង្ហាញ ប្លង់ដី នៅតំបន់នេះថា មានកម្មសិទ្ធិអស់ទៅហើយ។
អ្វីដែលប្រជាពលរដ្ឋនៅក្រុងព្រះសីហនុ ចងចាំបំផុត គ្មានថ្ងៃបំភ្លេចនោះ គឺនៅថ្ងៃទី២៨ ខែឧសភា ឆ្នាំ២០០៥ ជំនាន់លោក សាយ ហាក់ នៅជាអភិបាលក្រុងព្រះសីហនុ (ឥលូវខេត្តព្រះសីហនុ) រាល់សំណង់ អនាធិបតេយ្យ តូចធំដែល សាងសង់រំលោភបំពានលើដីបឹង និងដីចំណីបឹងព្រែកទប់ (ក្រៅពីប្រជាពលរដ្ឋ៥១គ្រួសារដែល ភាគច្រើនជាគ្រួសារមន្រ្តីអង្គភាពរដ្ឋាករទឹក) ត្រូវបានសម្តេចនាយករដ្ឋមន្រ្តីដាក់បទបញ្ជាយ៉ាងម៉ឺងម៉ាត់ឲ្យលោក សាយ ហាក់ ជាចៅហ្វាយក្រុង វាយកម្ទេចចោលអស់គ្មានសល់ ដោយក្នុងនោះ គេសង្កេតឃើញថា រាល់សំណង់ អនាធិបតេយ្យទាំងនោះភាគច្រើនជាសំណង់រឹងមាំរបស់ អ្នកមានលុយ មានអំណាចមានបុណ្យសក្តិធំៗទាំងអស់។ ជាក់ស្តែងដូចជាសំណង់រឹងមាំ របស់លោក ខាត់ ប៊ុណ្ណា ជំនាន់នោះ ជាប្រធានការិយាល័យសុរិយោដី ខណ្ឌ មិត្តភាព ផងដែរ។
រាល់ចំណាត់ការដ៏មានប្រសិទ្ធភាពរបស់សម្តេចតេជោនាពេលនោះ ប្រជាពលរដ្ឋរស់នៅក្នុងខេត្ត ទាំងមូលបាន សម្តែងនូវភាពរីករាយ និងគាំទ្រសម្តេចយ៉ាងពេញទំហឹង ដោយម្នាក់ៗបាននៅចងចាំទិដ្ឋភាព ការវាយកំទេច ចោលសំណង់អនាធិបតេយ្យ ដែលមាននៅជុំវិញបឺងគ្មានថ្ងៃបំភ្លេចបាននោះឡើយ។
ប៉ុន្តែសម្រាប់អាណត្តិ នៃការគ្រប់គ្រងដោយ លោកអភិបាលខេត្តព្រះសីហនុ ស្បោង សារ៉ាត វិញ បឹងព្រែកទប់ ត្រូវបានគេឃុបឃិតគ្នាមាន លក្ខណៈជាប្រព័ន្ធដោយប្រើគ្រប់វិធីសាស្រ្តភូតកុហក់ ប្រមុខរាជរដ្ឋាភិបាល ដោយ យកប្រជាពលរដ្ឋនៅជិតវត្តឥន្ធញ្ញាណ និងជិតអង្គភាពរដ្ឋាករទឹកចំនួន ៥១គ្រួសារមកធ្វើជាខែលរហូត បានសម្រេច ដោយរាជរដ្ឋាភិបាលបានចេញស.ជ.ណ.លេខ៤៩៨ ចុះថ្ងៃទី១១ ខែឧសភា ឆ្នាំ២០១២ ដែលមានលក្ខខណ្ឌ ៦ចំណុចតម្រូវឲ្យអាជ្ញាធរអនុវត្តតាម។
នៅថ្ងៃទី៥ ខែឧសភា ឆ្នាំ២០១៤នេះ មជ្ឈមណ្ឌលព័ត៌មានដើមអម្ពិល មិនទាន់អាចទាក់ទងលោក ហ៊ុន ភី ដែលទើបតែឡើងកាន់ដំណែងជាប្រធានមន្ទីរដែនដីនគរូបីយកម្ម សំណង់ និងសុរិយោដីខេត្តព្រះសីហនុ បាននៅឡើយទេ។
គេដឹងហើយថា កាលពីជំនាន់លោក សូ សុខ នៅធ្វើជាប្រធានមន្ទីរដែនដីនគរូបីយកម្ម សំណង់ និងសុរិយោដី ខេត្តព្រះសីហនុ គឺដីនៅតាមតំបន់ដែលបានរៀបរាប់ខាងលើនេះ មិនអនុញ្ញាតឲ្យអ្នកមានលុយ មានអំណាច កាន់កាប់ជាកម្មសិទ្ធិផ្ទាល់ខ្លួននោះទេ៕