ភ្នំពេញ៖ បញ្ហាទាមទារទឹកដី ទាំងទឹកដីខ្មែរកម្ពុជាក្រោម ក៏ដូចជាកោះត្រល់ផងនោះ បានក្លាយជាប្រធានបទ ដ៏សំខាន់ របស់គណបក្សសង្រ្គោះជាតិ ក្នុងយុទ្ធនាការស្វែងរកប្រជាប្រិយភាព របស់ខ្លួន តាមរយៈសារ នយោបាយផ្សេងៗ។

ឆ្លើយតបសារនយោបាយរបស់ថ្នាក់ដឹកនាំបក្សប្រឆាំង ក្នុងការទាមទារដែនដីទាំងអស់នោះ លោក ឈាង វុន សមាជិក គណៈកម្មាធិការអចិន្ត្រៃយ៍ នៃរដ្ឋសភា ប្រធានគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និង ព័ត៌មាន នៃរដ្ឋសភា បានថ្លែងជំរុញឲ្យអ្នកនយោបាយ ដែលចង់ ទៅដណ្តើមកោះត្រល់មកវិញ ត្រូវពិចារណាមើលលើគំរូរបស់ ប៉ុល ពត ដែលបានអនុវត្តន៍ នៅពេល ពួកគេកាន់អំណាចក្នុងចន្លោះឆ្នាំ ១៩៧៥ ដល់ឆ្នាំ ១៩៧៨។

លោក ឈាង វុន តាមរយៈលិខិតចំហរបស់ខ្លួន ដែលចែកចាយដល់បណ្តាញព័ត៌មាននៅថ្ងៃទី៩ ខែមិថុនា ឆ្នាំ២០១៤នេះ បានបញ្ជាក់ថា ការដោះស្រាយបញ្ហា តាមកម្លាំងក្នុងរបបកម្ពុជាប្រជាធិបតេយ្យ របស់ប៉ុល ពត ត្រូវបានបញ្ជាក់យ៉ាងច្បាស់ នៅក្នុងអត្ថបទ នៃព្រឹត្តិបត្រស្វែងរកការពិត ផ្នែកប្រវត្តិសាស្រ្ត និង ការស្រាវជ្រាវ លេខ១៥៥ ខែវិច្ឆិកា ឆ្នាំ២០១២។

លោក ឈាង វុន បានបញ្ជាក់ថា «ការបាត់បង់ទឹកដី នៃមាតុភូមិ គឺយើងទាំងអស់គ្នា មានការឈឺចាប់ណាស់ តែជំរុញឲ្យប្រជាពលរដ្ឋរងទុក្ខវេទនា ខ្លោចផ្សារថែមទៀត គឺចាំបាច់ត្រូវជៀសវាង» ។

លោក ឈាង វុន ក៏បានស្នើឲ្យអ្នកសារព័ត៌មានជាតិ និង អន្តរជាតិ រួមទាំងប្រជាពលរដ្ឋខ្មែរ កម្ពុជាក្រោមផង ត្រូវធ្វើ ការវិនិច្ឆ័យថា តើការបាត់បង់កោះត្រល់ជាកំហុសរបស់គណបក្សប្រជាជនកម្ពុជា ឬកំហុសសម្តេចតេជោ ហ៊ុន សែន ឬជាកំហុសរបស់ ប្រជាពលរដ្ឋខ្មែរកើតក្រោយឆ្នាំ១៩៤៩ ឬយ៉ាងណា?

- ដូនចាស់ ប្រកបរបរលក់លត ចិញ្ចឹមចៅពិការ ខណៈឪពុក-ម្តាយ បំបរបង់ចោល

- ប្រាក់ឧបត្ថម្ភ របស់លោកស្រី ម៉ែន សំអន និងសប្បុរសជន ជាង ១លានរៀល ជូនដល់ដៃកុមារីកម្សត់

ភ្នំពេញ ៖ ទំនាស់ពាក្យសម្តីរបស់គូស្វាមីភរិយាក្មេងខ្ចីមួយគូ បានបន្សល់នូវវិប្បដិសារី ដ៏សោកសៅធ្វើ ឲ្យកុមារីដ៏ទ្រលុកទ្រលន់ម្នាក់ ដែលមានវ័យទើប ៦ខែ រងនូវអំពើហិង្សាធ្លាក់ខ្លួនពិការពេញមួយជីវិត។ កាន់តែគួរឲ្យអាណិតអាសូរថែមទៀត កុមារីដ៏កម្សត់រូបនេះ ក្រោយធ្លាក់ខ្លួនពិការ ត្រូវឪពុក និងម្តាយ បំបរបង់ចោល ទុកឲ្យនៅជាមួយដូនចាស់ដោយការប្រកបរបរលក់លត ។

អ្នកស្រី ជីវ ឡេង វ័យជិត ៦០ឆ្នាំ បានរៀបរាប់ប្រាប់មជ្ឈមណ្ឌលព័ត៌មានដើមអម្ពិលថា កុមារីកម្សត់ លីហ្សា ពេល កើតមកមានកាយសម្បទា សតិបញ្ញា និងសុខភាពដូចក្មេងទូទៅធម្មតា ហើយមានរូប សម្បត្តិទ្រលុកទ្រលន់គួរឲ្យស្រឡាញ់ថែមទៀតផង ។

តែជាអកុសលនៅថ្ងៃមួយ គ្រាដែលកុមារីរូបនេះ មានអាយុបាន ៦ខែ ស្រាប់តែឪពុក-ម្តាយ មានជម្លោះ ពាក្យសម្តី ស្រ្តីជាម្តាយបានចាប់កុមារីទង្គិចទៅនឹងជញ្ជាំង បណ្តាលឲ្យដាច់សរសៃខួរក្បាល សន្លប់ស្តូក ស្តឹងអស់ជាច្រើនថ្ងៃគ្មានសង្ឃឹមថា អាចស្រោចស្រង់ជីវិតបាននោះទេ ។

អ្នកស្រី ជីវ ឡេង បានថ្លែងបន្តថា ដោយមានការព្យាយាមជួយសង្រ្គោះពីក្រុមគ្រូពេទ្យគន្ធបុប្ផាកុមារី ក៏ បានដឹងខ្លួនឡើងវិញ តែកាយសម្បទា សតិបញ្ញាស្មារតី របស់នាងមិនដូចដើមទៀតនោះទេ ពោលកាយ សម្បទា ដៃ ជើង និងភ្នែក ត្រូវរងនូវភាពពិការជារៀងរហូត ។

ពីក្នុងមជ្ឈមណ្ឌលគៀនឃ្លាំង ស្ថិតតាមបណ្តោយផ្លូវជាតិលេខ៦ ខណ្ឌឬស្សកែវ អ្នកស្រី ជីវ ឡេង ដែល កំពុងយកចៅរបស់ខ្លួនទៅធ្វើចលនាសាស្រ្តនោះ បានឲ្យដឹងទៀតថា កុមារី លីហ្សា ក្រោយពេលទទួល រងនូវភាពពិការហើយ ឪពុក-ម្តាយ បានចែកផ្លូវគ្នា ឪពុកទៅយកភរិយាថ្មី រីឯម្តាយក៏ចេញឆ្ងាយពីស្រុក បាត់ជារៀងរហូត មិនមាននរណា អាណិតស្រណោះ នៅមើលថែកូនរបស់ខ្លួនឡើយ ។

ដោយក្តីអាណិតអាសូរ និងអតីតភាពធ្លាប់ហែលឆ្លងភាពលំបាកវេទនា ក្នុងនាមជាកុមារកំព្រា អ្នកស្រី ជីវ ឡេង មិនដាច់ចិត្តទុកចៅពិការចោលនោះឡើយ ទោះបីអ្នកស្រីមានជីវភាពទីទ័លលំបាកយ៉ាងណា ក្តី ក៏នៅតែត្រដរលក់លត ចិញ្ចឹមចៅរហូតដល់ពេលបច្ចុប្បន្ន ។

អ្នកស្រី ជីវ ឡេង «ខ្ញុំលំបាកណាស់ក្នុងជីវភាព គ្មានអ្វីចិញ្ចឹមចៅទេ ។ រាល់ថ្ងៃប្រកបរបរលក់លត គ្រាន់ បានលុយខ្លះ ទិញទឹកដោះគោ ឲ្យនាងបៅ ។ ពេលខ្លះអ្នកក្នុងភូមិគាត់ប្រាប់ខ្ញុំថា អ៊ំឯងខំម៉េស ជីវភាព ទីទ័លក្រចឹងនោះ ទុកឲ្យនាង (កុមារីរងគ្រោះ) ទៅតាមដំណើរទៅ ឲ្យរួចផុតកម្មរបស់នាង។ តែខ្ញុំចិត្ត មិនដាច់ ក៏ខិតខំត្រដរចិញ្ចឹមចៅរហូតមក»។

បច្ចុប្បន្នកុមារី លីហ្សា ត្រូវបានជីដូនរបស់ខ្លួន យកទៅព្យាបាលតាមរយៈធ្វើចលនាសាស្រ្ត និងបើកយក ថ្នាំរលាកខួរក្បាល ពីមន្ទីរពេទ្យគន្ធបុប្ផាជាប្រចាំ ។

បើតាមអ្នកស្រី ជីវ ឡេង ក្រោយពីការយកទៅព្យាបាល តាមរយៈចលនាសាស្រ្តបានរយៈពេលប្រហែល ជា ២ខែនោះ កុមារី លីហ្សា អាចកម្រើកដៃជើងបានខ្លះ ហើយអាចស្រែកយំបាន ជាពិសេស កុមារីមិន សូវប្រកាច់ដូចមុននោះទេ ។ មុនពេលទទួលការព្យាបាលកុមារីឧស្សាហ៍ជួបការប្រកាច់ខ្លាំងណាស់។ បច្ចុប្បន្នក្រៅពីពិការភាព កុមារីក៏មានជំងឺរលាកខួរក្បាល និងរលាកសួតផងដែរ។

សូមបញ្ជាក់ថា ដោយក្តីអាណិតអាសូរចំពោះកុមារីកម្សត់នេះ មានសប្បុរសជនជាច្រើននាក់ បានចូល រួមឧបត្ថម្ភថវិកាដល់កុមារី សម្រាប់ចំណាយលើថ្លៃទឹកដោះគោះ និងតម្រូវរបស់ជីដូន។ ថវិកាជាង ១ លានរៀល របស់សប្បុរជន តាមរយៈមជ្ឈមណ្ឌលព័ត៌មានដើមអម្ពិល ត្រូវបានយកទៅប្រគល់ដល់ដៃ ជីដូនរបស់ លីហ្សា ហើយ កាលពីថ្ងៃទី០៨ ខែមិថុនា ឆ្នាំ២០១៤ ។

អ្នកស្រី ជីវ ឡេង ជាការឆ្លើយតប ចំពោះទឹកចិត្តដ៏សណ្តោសប្រណីរបស់សប្បុរសជននោះ បានលើកដៃ ប្រណមថ្លែងអំណរគុណ និងជូនពរឲ្យសប្បុរសជនទាំងអស់ បានជួបតែសេចក្តីសុខ និងជោគជ័យគ្រប់ ភារកិច្ច ។

ថវិកាទាំងនោះ បានមកពីលោកស្រីឧបនាយករដ្ឋមន្ដ្រី ម៉ែន សំអន រដ្ឋមន្ដ្រីក្រសួងទំនាក់ទំនង ព្រឹទ្ធ សភា រដ្ឋសភា និងអធិការកិច្ច ៥០ម៉ឺនរៀល, ឧត្តមសេនីយ៍ទោ ប៊ូ សុខគីម មេបញ្ជាការរង យោធភូមិ ភាគទី៣ ១០០ដុល្លារ, លោក ឃិន សារ៉ាត់ បុគ្គលិកបម្រើការងារ នៅក្រុមហ៊ុនសូគីម៉ិចឧបត្ថម្ភ ៣០ ដុល្លារ, លោក អន សុផុន បុគ្គលិកនៅសណ្ឋាគារកាំបូឌីយ៉ាណា ប្រធានផ្នែកលក់ ១០ដុល្លារ និង លោក ឃុន ខែម និងភរិយា ១០ម៉ឺនរៀល ។

ទោះបីជាយ៉ាងណា អ្នកស្រី ជីវ ឡេង នៅតែទទូចស្វែងរកជំនួយសប្បុរសពីសប្បុរសជន ដែលមាន ចិត្តសណ្តោស មេត្តាជួយឧបត្ថម្ភបន្តទៀត ដើម្បីបានថវិកាយកទៅទិញទឹកដោះគោចិញ្ចឹមចៅ ត្បិតអ្នក ស្រីសព្វថ្ងៃមានជីវភាពលំបាកខ្លាំង និងមានវ័យកាន់តែចំណាស់ហើយ បើអត់ពីអ្នកស្រីទៅ មិនដឹងមាន នរណាជួយបីបាច់ថែរក្សាជំនួសនោះទេ ។

អ្នកស្រីក៏ស្វាគមន៍ ដល់សប្បុរសជន និងអង្គការនានា ដែលមានបំណងចង់យកចៅអ្នកស្រីទៅព្យាបាល និងចិញ្ចឹម ផងដែរ ។

បើសប្បុរសជនណា ចង់ចូលរួមបរិច្ចាក ឬឧបត្ថម្ភជីវភាពរស់នៅ របស់ក្មេងស្រីរូបនេះ អាចទាក់ទង តាមលេខទូរស័ព្ទរបស់លោកយាយ ជីវ ឡេង ៖ ០១៥ ៩៣ ៨១ ៧១ ៕

ភ្នំពេញ៖ ប្រធានមូលនិធិបាយ័ន បុត្រីទី២ របស់សម្តេចតេជោ និងសម្តេចកិត្តិព្រឹទ្ធបណ្ឌិត លោកស្រី ហ៊ុន ម៉ាណា ពេញមួយថ្ងៃទី៩ ខែមិថុនា ឆ្នាំ២០១៤ នេះ បានដឹកនាំសប្បុរសជន ធ្វើដំណើរទៅកាន់ខេត្តព្រៃវែង និងខេត្តស្វាយរៀង ដើម្បីផ្តល់អំណោយ ដល់ប្រជាពលរដ្ឋក្រីក្រខ្វះទីពីង។

នៅពេលព្រឹកប្រធានមូលនិធិបាយ័ន លោកស្រី ហ៊ុន ម៉ាណា បានដឹកនាំសប្បុរសជនមួយក្រុម ធ្វើដំណើរ ទៅកាន់ឃុំស្តៅកោង ស្រុកបាភ្នំ ខេត្តព្រៃវែង នៅទីនេះ លោកស្រី និងក្រុមសប្បុរសជន បានផ្តល់ផ្ទះទេវតា មួយខ្នងជូនដល់លោកយាយ ជុំ ណំា វ័យ៧០ឆ្នាំ ដែលមានជីវភាពក្រខ្សត់ ។

លោកយាយ ជុំ ណាំ ក្រោយពីទទួលបានផ្ទះ ដែលជាជម្រកស្នាក់នៅ ក៏បានថ្លែងអំណគុណ ដល់លោកស្រី ហ៊ុន ម៉ាណា ក៏ដូចជាសប្បុរសជន ថានេះជាការធ្វើបុណ្យទាន់ខែភ្លឺ ចំពោះមនុស្សចាស់ក្រខ្សត់ រស់នៅខ្វះ មុខខ្វះក្រោយ ហើយជម្រកមួយនេះ ពិតជាបានផ្តល់ភាពកក់ក្តៅដល់រូបគាត់ និងក្រុមគ្រួសារជាខ្លំាង។

នៅក្នុងឱកាសនោះដែរ ក្រោយពីបានប្រគល់ផ្ទះទេវតារួចមក ក្រុមការងារក៏បានផ្តល់នូវ រទេះរុញចំនួន២ គ្រឿងដល់លោកតា លោកយាយ ចាស់ជរា រួមនិងថវិការ មួយចំនួនទៀតដល់អ្នកភូមិផងដែរ។
បន្ទាប់ពីបញ្ចប់ពិធីប្រគល់ផ្ទះទេវតា រួចធ្វើដំណើរទៅមុខបានបន្តិច ក្បួនរថយន្តក៏បានឈប់លោកស្រី ហ៊ុន ម៉ាណា និងក្រុមសប្បុរសជន បានចុះទៅខ្ទមដ៏តូចមួយនៅជាប់ផ្លូវដែលជាទីស្នាក់អាស្រ័យរបស់ លោកស្រី ហុង យ៉ោម សមជិកភូមិមួយរូប ក្នុងឃុំស្តៅកោង ក្រុមការងារក៏បានផ្តល់ជូនសំភារៈប្រើប្រាស់ប្រចាំថ្ងៃមួយចំនួនធំ រួមនិងថវិការខ្លះផងជូនដល់ប្រជាពលរដ្ឋក្រីក្ររូបនេះដើម្បីដោះស្រាយ ជីវភាពទីទាល់ក្របានមួយគ្រាផងដែរ។

បញ្ចប់កិច្ចការងារមនុស្សធម៌ក្នុងខេត្តព្រៃវែង ក្រុមមូលនិធិបាយ័ន ក៏បានបន្តដំណើរតាមផ្លូវលំ ក្នុងភូមិមួយចំនួន ក្នុងស្រុកស្វាយទាប ស្រុករមាសហែក និងស្រុករំដួល របស់ខេត្តស្វាយរៀង ដើម្បីស្វែងរកអ្នកទីទាល់ក្រ ជាក់ស្តែងរួច ប្រគល់សំភារៈប្រើប្រាស់ប្រចាំថ្ងៃ គ្រឿងហូបចក់ និងថវិការមួយចំនួនដើម្បីឲ្យពួកគាត់យក ទៅដោះស្រាយ ជីវភាពរស់នៅ ។ ក្នុងការធ្វើដំណើរ លោកស្រី ហ៊ុន ម៉ាណា បានផ្តល់អំណោយ សប្បុរសធម៌ ដល់ប្រជាពលរដ្ឋក្រីក្រចំនួន២ គ្រួសារ ក្នុងស្រុកស្វាយទាប ប្រជាពលរដ្ឋ៤គ្រួសារទៀត នៅស្រុករមាសហែក រួមនិង៤គ្រួសារបន្ថែមទៀតនៅក្នុងស្រុករំដួល។

ក្នុងសកម្មភាពនេះ ក្រុមអ្នកភូមិបាននាំគ្នានិយាយក្នុងសំឡេងតែមួយថា ទង្វើនេះជាអ្វីដែលពួកគាត់ចង់បាន ក៏ព្រោះអំណោយសប្បុរសធម៌នេះ បានចុះមកដល់គោលដៅ ចំពោះគ្រួសារដែលមានជីវភាពទីទាល់ក្រ ពួកគាត់មិនច្រណែននោះទេ ព្រោះអំណោយនេះបានប្រគល់ ទៅដល់ដៃអ្នកអត់ អ្នកក្រខ្វះខាតដោយផ្ទាល់ ពីសប្បុរសជនទាំងអស់ ៕

លោក អុឹម សួស្តី ប្រធានគណៈកម្មាធិការជាតិ រៀបចំការបោះឆ្នោត ហៅកាត់ថា គជប បានថ្លែងថា   ប្រធានគណ:បក្សសង្រ្គោះជាតិ បានប្រកាស ទទួលស្គាល់ លទ្ធផលបោះឆ្នោត ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ ឆ្នាំ២០១៤ មុនគ.ជ.ប ប្រកាសលទ្ធផលជាផ្លូវការ ដែលនេះបង្ហាញ ពីការវិវឌ្ឍន៍ទៅមុខ របស់ គជប ។

ការថ្លែងបែបនេះក្នុងឱកាស បើកសន្និបាតបូកសរុបការងារបោះឆ្នោតជ្រើសរើស ក្រុមប្រឹក្សារាជធានីខេត្ត ក្រុង ស្រុក ខណ្ឌ អាណត្តិទី២ ឆ្នាំ២០១៤ នៅក្រុងព្រះសីហនុ ចំពោះមុខថ្នាក់ដឹកនាំ គជប និងប្រធាន អនុប្រធាន សមាជិកទូទាំងប្រទេស នារសៀលថ្ងៃទី០៩ ខែមិថុនា ឆ្នាំ២០១៤នេះ នៅសណ្ឋាគារ ឆ្នេរជលសា ស្ថិត ក្នុងក្រុងព្រះសីហនុ ខេត្តព្រះសីហនុ ៕

ភ្នំពេញ៖ អ្នកមានលុយ មានអំណាច និងមន្រ្តីជាន់ខ្ពស់ នៃរាជរដ្ឋាភិបាលកម្ពុជា ប្រហែលជាមិនធ្លាប់ជួប ហើយក៏ ប្រហែលជាមិនបានដឹងដែរថា ការបម្រើសេវាកម្ម នៅតាមក្រសួង មន្ទីរ ស្ថាប័នរបស់រដ្ឋវាលំបាកយ៉ាងណានោះ? ព្រោះអ្នកមានលុយ មានអំណាច និង មន្រ្តីជាន់ខ្ពស់ បើត្រូវការស្វែងរកសេវាកម្មអ្វីមួយពីក្រសួង មន្ទីរ ស្ថាប័ន គឺ សុទ្ធតែមានកិច្ចអន្តរាគមន៍ពីថ្នាក់ដឹកនាំកំពូល នៃក្រសួង មន្ទីរ ឬស្ថាប័នណាមួយនោះជាមិនខាន។ ផ្ទុយទៅវិញ ប្រជាពលរដ្ឋ ដែលជាសាមញ្ញជន តែងតែនាំគ្នារអ៊ូរទាំ និងធុញធ្រាន់ស្ទើរគ្រប់គ្នា ពេលទៅស្វែងរកសេវាកម្មពី ក្រសួង មន្ទីរ និងស្ថាប័នរបស់រដ្ឋម្តងៗ ព្រោះត្រូវប្រឈមស្ទើរគ្រប់រូបភាព រូបភាព នៃការមិនស្វាគមន៍ ប្រើពាក្យ សម្តីគំរោះគំរើយពីសំណាក់មន្រ្តីបម្រើការនៅតាមក្រសួង មន្ទីរ និងស្ថាប័ន ជាពិសេសសេវាកម្មយឺតយ៉ាវ និងស្មុគ ស្មាញ ពេលខ្លះប្រជាពលរដ្ឋឮតែធ្វើអ្វីពាក់ព័ន្ធជាមួយស្ថាប័នរបស់រដ្ឋ ធ្វើឲ្យពួកគាត់នឿយណាយមិនចង់ធ្វើតែ ម្តង។

កាលពីយប់ថ្ងៃអាទិត្យ ទី០៨ ខែមិថុនា ខ្ញុំបានទៅអង្គុយទទួលទានអាហារសម្រន់ពេលចេញពីធ្វើការនៅអាហារ ដ្ឋានមួយតាមបណ្តោយមហាវិថីម៉ៅសេទុង ក៏ជួបមិត្តភក្តិម្នាក់ និយាយចុះនិយាយឡើង គាត់បានរអ៊ូរទាំពីការលំ បាក ពេលទៅស្វែងរកសេវាកម្មរបស់ស្ថាប័នរដ្ឋ។ មិត្តភក្តិរបស់ខ្ញុំ គាត់បានដឹងថា ខ្ញុំធ្វើនៅមជ្ឈមណ្ឌលព័ត៌មាន ដើមអម្ពិល គាត់បានរអ៊ូរទាំប្រាប់ តែសូមមិនឲ្យចុះផ្សាយអីនោះទេ ព្រោះក្លាចក្រសួងគេខឹង គេផ្អឹបឯកសាររបស់ គាត់។ តែរពិសអីធ្វើជាអ្នកកាសែត ឲ្យតែបានឮអ្វី ដែលជាទុក្ខកង្វល់របស់ប្រជាពលរដ្ឋ នៅមិនសុខ ក៏លើកមក បង្ហាញជាសាធារណៈក្រែងឡោ ដឹងដល់ប្រមុខរាជ រដ្ឋាភិបាល និងថ្នាក់ដឹកនាំក្រសួងស្ថា ប័នរដ្ឋ ងាយស្រួលក្នុង ការកែតម្រូវចំណុចអសកម្មទាំងអស់នេះ និងផ្តល់ជូននូវសេវាកម្មល្អដល់ប្រជាពលរដ្ឋ។ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏ធ្លាប់មានប្រសាសន៍លើកទឹកចិត្តឲ្យមានការចេញផ្សាយពីចំណុច អសកម្មក្នុងស្ថាប័នរបស់រដ្ឋផងដែរ។

មិត្តភក្តិខ្ញុំនេះ រស់នៅក្នុងរាជធានីភ្នំពេញ បានស្វែងរកការបង់ពន្ធប្រថាប់ត្រាលើលិខិតផ្ទេរប្លង់កម្មសិទ្ធិដីធ្លី និង ផ្ទះ សម្បែងរបស់ខ្លួន ស្ថិតនៅក្នុងភូមិចំការឪឡឹក សង្កាត់កាកាប ខណ្ឌពោធិ៍សែនជ័យ ពីអគ្គនាយកដ្ឋានពន្ធដារ ស្ថិត នៅជាប់ស្តុបទួលគោក បានត្អូញត្អែរប្រាប់ថា គាត់ស្ទើរតែឆ្អែតជាមួយការបម្រើសេវាកម្មតាមក្រសួង មន្ទីរ និង ស្ថាប័នរបស់រដ្ឋ ហើយថ្ងៃក្រោយបើមានអ្វី ដែលពាក់ព័ន្ធសេវាកម្មពីរដ្ឋ គឺមិនចង់ធ្វើទៀតនោះទេ។

មិត្តភក្តិម្នាក់នេះ បានថ្លែងរៀបរាប់ទៀតថា នៅពេលថ្មីៗនេះ រូបគាត់បានលក់ផ្ទះ និងដីមួយកន្លែងស្ថិតនៅក្នុង ភូមិចំការឪឡឹក សង្កាត់កាកាប ខណ្ឌពោធិ៍សែនជ័យ ជាផ្ទះ និងដី ដែលមានប្លង់រឹង ជាហេតុតម្រូវឲ្យធ្វើការរត់ការ កាត់ប្លង់ផ្ទេរកម្មសិទ្ធិជូនទៅអ្នកទិញ។ ការកាត់ប្លង់រឹងនេះ បានធ្វើជាច្រើនដំណាក់កាល ពោលតម្រូវឲ្យបំពេញសំ ណុំបែបបទរដ្ឋបាល និងលិខិតស្នាមនានា ពីមន្រ្តីពាក់ព័ន្ធតាំងពីថ្នាក់ខណ្ឌ រហូតដល់មន្ទីរដែនដី នគរូបនីយកម្ម សុរិយោដី និងសំណង់រាជធានីភ្នំពេញ។

ការស្វែងរកសេវាកម្មនេះ គាត់ត្រូវជិះម៉ូតូចុះឡើង ពីខណ្ឌទៅមន្ទីរ ពីមន្ទីរទៅខណ្ឌ ថ្ងៃខ្លះទៅហើយមិនជួបប្រធាន ដែលជាអ្នកចុះហត្ថលេខា ក៏ត្រឡប់មកផ្ទះវិញ ត្រូវព្យាយាមទៅមួយដង ពីរដងទើបបានជួប។ ទម្រាំរត់ចប់ពីថ្នាក់ ខណ្ឌ និងមន្ទីរដែនដី នគរូបនីយកម្ម គឺចំណាយពេលជិតមួយខែទៅហើយ។

បន្ទាប់ពីការរត់ការបំពេញបែបបទនានា ជាច្រើនត្រឡប់ ច្រើនកន្លែង ដោយចំណាយរយៈពេលជិតមួយខែនោះ បច្ចុប្បន្នឯកសារផ្ទេរកម្មសិទ្ធិដីធ្លីនេះ ត្រូវបានមកដល់អគ្គនាយកដ្ឋានពន្ធដារហើយ ដើម្បីធ្វើការគណនាពន្ធ និង បង់ពន្ធលើដីធ្លី និងផ្ទះ។ លិខិតស្នាមបង់ពន្ធ ក្រោយដាក់នៅក្នុងអគ្គនាយកដ្ឋានពន្ធដារ រហូតដល់ថ្ងៃទី១០ ខែ មិថុនា ឆ្នាំ២០១៤នេះ ជាសប្តាហ៍ទី៣ទៅហើយ តែមិនទាន់មានមន្រ្តីពន្ធដារហៅទៅយកលិខិតបង់ពន្ធ ឬត្រូវធ្វើ ការបង់ពន្ធយ៉ាងណាឡើយ ពេលទូរស័ព្ទទៅសួរមន្រ្តីបម្រើការ ពួកគេបានត្រឹមនិយាយថា ឯកសារនឹងយូរបន្តិច ព្រោះត្រូវ ឆ្លងអគ្គនាយករង និងអគ្គនាយកគាត់ពិនិត្យ និងចុះហត្ថលេខាជាច្រើនដំណាក់កាលទៀត។

មិត្តភក្តិរបស់ខ្ញុំ បានថ្លែងបន្តជាមួយទឹកមុខមាំ និងហាក់មានការខឹងសម្បាថា «ខ្ញុំពិតជាឆ្អែតចិត្ត និងធុញទ្រាន់ជា មួយសេវាកម្មរបស់ក្រសួង មន្ទីរ ស្ថាប័នរដ្ឋណាស់ សេវាកម្មមិនត្រឹមតែស្មុគស្មាញនោះទេ ហើយវាយូរទៀត បើ សិនជាខ្ញុំត្រូវការលក់ផ្ទះ ដើម្បីយកទុនរកស៊ី ឬ វិនិយោគជាមួយដៃគូណាមួយ គេប្រហែលជាលុបកិច្ចសន្យាចោល វិញហើយ ព្រោះវាយូរពេក។ មិនតែប៉ុណ្ណោះ ពេលខ្ញុំទៅជួបមន្រ្តីបម្រើការងារម្តង ខ្ញុំត្រូវរៀបឬកឲ្យសុភាព ហើយ ឱនលំទោនថែមទៀត ព្រោះក្លាចមន្រ្តីមិនស្រូតធ្វើការងារឲ្យ។ មន្រ្តីខ្លះលេងទឹកមុខទ្រង់មិនសប្បាយចិត្តប្រើពាក្យ សម្តីគំរោះគំរើយដាក់ទៀត យើងមិនហ៊ានតបតអ្វីវិញទេ ព្រោះក្លាចគេផ្អឹបឯកសារទុកចោល»។

មិត្តភក្តិរូបនេះ បានបន្តថា នៅពេលគាត់យកឯកសារចូលទៅអគ្គនាយកដ្ឋានពន្ធដារក្រឡេកឃើញគេចាក់កិច្ច សម្ភាសន៍របស់អគ្គនាយក នៃអគ្គនាយកដ្ឋានពន្ធដារ លោក គង់ វិបុល ពីការព្យាយាមកែទម្រង់ក្នុងការបម្រើស សេវាកម្មនានា ក៏ដូចជាការប្តេជ្ញាចិត្តបម្រើការងារជូនរដ្ឋ ធ្វើឲ្យគាត់មានក្តីរំពឹងថា អគ្គនាយកដ្ឋានពន្ធដារ ប្រហែល ជាស្ថាប័នរដ្ឋ ដែលឈានមុខគេក្នុងការបម្រើប្រជាពលរដ្ឋហើយ ហើយប្រហែលជាគ្មានអ្វីបង្កការលំបាកដល់គាត់ ទៀតនោះទេមើលទៅ។ តែមិនដូចការគិតអី ពេលចូលទៅធ្វើទើបដឹងថា វាមិនខុសគ្នាពីកន្លែងផ្សេងប៉ុន្មានទេ ឌៀ តែខ្នូច ដូចតែគ្នាហ្នឹង។

«គ្រាន់តែមន្រ្តីចុះទៅវាស់វែងផ្ទះ និងដី គាត់ណាត់ថា ទៅវាស់ឲ្យ ខំតែទៅចាំអស់មួយកំណាត់ថ្ងៃ ទូរស័ព្ទទៅសួរ គាត់ គាត់ថារវល់ទៅវាស់ផ្ទះឲ្យគេក្នុងបុរី ឲ្យចាំបន្តិចទៀតគាត់ទៅវាស់វែងឲ្យ ចាំប្រហែលជាមួយម៉ោងទៀត ខល ទៅសួរ គាត់ប្រាប់ថា អត់បានទៅទេ ជាប់រវល់ប្រពន្ធឆ្លងទន្លែង។ រហូតដល់ថ្ងៃបន្ទាប់ទូរស័ព្ទទៅលួងលោមឡើង ទន់សាច់ ទើបគាត់ព្រមទៅវាស់វែងឲ្យ»។

តាមរយៈការត្អូញត្អែរនេះ មិត្តភក្តិរបស់ខ្ញុំ ដែលកំពុងរង់ចាំការពិនិត្យ និងសម្រេចចុះហត្ថលេខាបង់ពន្ធ បានលើក ឡើងថា មិនដឹងជាលោកអគ្គនាយក គង់ វិបុល បានដឹងពីភាពយឺតយ៉ាវ នៃការផ្តល់សេវាកម្មក្នុងស្ថាប័នរបស់ លោកដែរឬទេ ប្រសិនជាបានដឹង គួរតែរិះរកវិធីពន្លឿន និងកែសម្រួល ព្រោះមានប្រជាពលរដ្ឋច្រើនណាស់ មាន ការរអ៊ូរទាំ ដូចគ្នានេះដែរ ហើយអ្នកខ្លះទៀត កាន់ឯកសារឡើងទក់ទីទៅហើយ មិនទាន់សម្រេចផង។ បើមិនកែ ទេ មិនដឹងថា ក្តីរំពឹង និងការជឿទុកចិត្តរបស់ពលរដ្ឋលើស្ថាប័នរដ្ឋ ធ្លាក់ទៅដល់ឋានណាទេ?

ឆ្លើយតបនឹងការរអ៊ូរទាំនេះ មជ្ឈមណ្ឌលព័ត៌មានដើមអម្ពិលកាលពីថ្ងៃចន្ទ ទី០៩ ខែមិថុនា បានព្យាយាមទូរស័ព្ទ ទៅលោក គង់ វិបុល ជាច្រើនលើក ដោយពេលព្រឹកលោកឆ្លើយថា ជាប់រវល់ប្រជុំ។ លុះពេលរសៀលទូរស័ព្ទចូល ជាច្រើនដង តែត្រូវលោកចុចផ្តាច់ទៅវិញ។

ការផ្តល់សេវាកម្មយឺតយ៉ាវ និងមានស្មុគស្មាញច្រើននេះ មិនមែនទើបតែឮចេញពីមិត្តភក្តិម្នាក់នេះទេ គឺបានឮពី ប្រជាពលរដ្ឋច្រើនគ្នាណាស់មកហើយ។ មិនតែប៉ុណ្ណោះ ព្រោះតែភាពស្មុគស្មាញ និងការលំបាកក្នុងការជួបជា មួយមន្ត្រី បូករួមនិងការមិនសូវយល់ពីនីតិវិធីក្នុងការបំពេញបែបបទ និងសំណុំឯកសារផ្សេងៗផងនោះ បានធ្វើឲ្យ ប្រជជាពលរដ្ឋមួយចំនួន មិនបានទៅស្វែងរកសេវាកម្មនានាដោយផ្ទាល់ខ្លួននោះទេ ដូចជាករណីផ្ទេរកម្មសិទ្ធិផ្ទះ សម្បែង ដីធ្លី ជាដើមនេះ ប្រជាពលរដ្ឋខ្លះ បានព្យាយាមទៅរកមន្រ្តី ឬអ្នកគក់ជេឯកសារឲ្យធ្វើជំនួស ដែលតម្រូវ ឲ្យគាត់ចំណាយថ្លៃសេវាខាងក្រៅរាប់ពាន់ដុល្លារទៅ តាមទំហំផ្ទះ និងដី។

ដើម្បីលុបបំបាត់ចំណុចអសកម្មលើសេវាកម្មនេះ គេសង្កេតឃើញរាជរដ្ឋាភិបាលកម្ពុជា ដែលដឹកនាំដោយសម្តេច តេជោ ហ៊ុន សែន ខិតខំបង្កើតច្រកចេញចូលតែមួយគ្រប់ក្រសួង មន្ទីរ ស្ថាប័ន។ ការដាក់ចេញនូវគោលនយោ បាយ និងការខិតខំធ្វើកំណែទម្រង់នេះ គេមើលឃើញថា មានភាពល្អប្រសើរ តែហាក់មិនទទួលបានជោគជ័យ ១០០ភាគរយនោះទេ ព្រោះថា មន្រ្តីដែលបម្រើការងារហាក់មិនទាន់ផ្លាស់ប្តូរឥរិយាបថ និងហាក់ដូចជានៅមាន សតិអារម្មណ៍មិនល្អក្នុងការបំពេញការងារនៅឡើយ ដូច្នេះការផ្តល់ជូននូវសេវាកម្មដល់ប្រជាពលរដ្ឋនៅតែមិន បានផលល្អប្រសើរដដែល៕

ប៉េកាំង៖ សារព័ត៌មាន Channel News Asia ចេញផ្សាយថ្ងៃទី០៩ ខែមិថុនា ឆ្នាំ២០១៤ បានឲ្យដឹងថា ប្រទេស ចិន បានសម្តែងការមិនពេញចិត្ត បន្ទាប់ពីកងកម្លាំងយោធារបស់ប្រទេសវៀតណាម និងហ្វីលីពីន ប្រកួតកីឡារួម គ្នានៅលើកោះ ដែលកំពុងមានជម្លោះ។ រដ្ឋមន្ត្រីការបរទេសរបស់រដ្ឋាភិបាលក្រុងប៉េកាំង ចាត់ទុកថា វាជាទង្វើ ដ៏ កំប្លែងមួយ។

ការលើកឡើងរបស់រដ្ឋាភិបាលក្រុងប៉េកាំង ធ្វើឡើងក្នុងរយៈពេលមួយថ្ងៃបន្ទាប់ពីប្រទេសវៀតណាម បានធ្វើជា ម្ចាស់ផ្ទះ សម្រាប់យោធាហ្វីលីពីន ក្នុងការៀបចំការប្រកួតកីឡានៅលើកោះ ដែលស្ថិតនៅក្នុងប្រជុំកោះ Spratly ស្ថិតក្នុងសមុទ្រចិនខាងត្បូង ដោយយោធាជើងទឹករបស់ហ្វីលីពីន បានចាត់ទុកថា វាជាការរឹតចំណងមិត្តភាពរវាង ប្រទេសទាំងពីរ។

សូមជំរាបថា ភាពតានតឹងរវាងប្រទេសចិន និងប្រទេសទាំងពីរ បានផ្ទុះយ៉ាងខ្លាំងក្នុងរយៈពេលមួយខែកន្លងទៅ នេះ ទាក់ទងនឹងការដណ្តើមកោះជម្លោះ ដោយឡែកជម្លោះរវាងរដ្ឋាភិបាលក្រុងហាណូយ និងប៉េកាំង បានបង្កើត ឲ្យមាននូវអំពើហិង្សា ក្នុងប្រទេសវៀតណាមកាលពីខែឧសភា កន្លងទៅ ដោយការធ្វើបាតុកម្មប្រឆាំងប្រទេសចិន ។

ឆ្លើយតបនឹងសំណួរទាក់ទងនឹងការប្រកួតកីឡារួមគ្នានេះ អ្នកនាំពាក្យរបស់រដ្ឋមន្ត្រីការបរទេសចិន  លោកស្រី Hua Chunying បាននិយាយដោយខ្លីថា តើអ្នកមិនគិតថា ការលេងកីឡា ដែលរៀបចំឡើងដោយហ្វីលីពីន និង វៀតណាម ហាក់គ្មានន័យអ្វីទាំងអស់ ប៉ុន្តែវាហាក់ដូចជារឿងគួរឲ្យអស់សំណើចមួយ៕

សេអ៊ូល៖ សារព័ត៌មាន Channel News Asia ចេញផ្សាយថ្ងៃទី០៩ ខែមិថុនា ឆ្នាំ២០១៤ បានឲ្យដឹងថា ប្រទេស កូរ៉េខាងជើងនាថ្ងៃចន្ទនេះ បានព្រមានថា នឹងចាត់វិធានការណ៍ខ្លាំងមួយប្រឆាំង នឹងការដាក់ការិយាល័យរបស់ អង្គការសហប្រជាជាតិ ក្នុងប្រទេសកូរ៉េខាងត្បូង ដើម្បីតាមដានការរំលោភសិទ្ធិមនុស្សក្នុងប្រទេសកុម្មុយនីស មួយនេះ។

គណៈកម្មាធិការរបស់ប្រទេស កូរ៉េខាងជើង ដើម្បីការបង្រួមបង្រួមកូរ៉េដោយសន្តិភាព បានរិះគន់ប្រទេសកូរ៉េខាង ត្បូង ដែលបានទទួលយកសំណើរបស់គណៈកម្មាធិការជាន់ខ្ពស់អង្គការសហប្រជាជាតិ ដើម្បីការគោរពសិទ្ធិ មនុស្ស ក្នុងការបើកការិយាល័យមួយនៅក្នុងទីក្រុងសេអ៊ូល។

អ្នកនាំពាក្យពីគណៈកម្មាធិការរបស់កូរ៉េខាងត្បូង បានលើកឡើងថា រដ្ឋាភិបាលក្រុងព្យុងយ៉ាង មានប្រតិកម្មយ៉ាង ខ្លាំងជាមួយរឿងនេះ ហើយប្តេជ្ញាប្រឆាំងដាច់ខាតចំពោះទង្វើខាងលើ។ យ៉ាងនេះក្តី ការិយាល័យ និងបុគ្គលិក នៃ ស្ថាប័នថ្មីនេះ ត្រូវបានរំពឹងថា មិនមែនជាគោលដៅ នៃសកម្មភាពខ្លួនឡើយ។

ប្រភពដដែលបានលើកឡើងថា ការិយាល័យរបស់អង្គការសហប្រជាជាតិក្នុងទីក្រុងសេអ៊ូល ជាការប្រឆាំងនឹងប្រទេសកូរ៉េខាងជើង វាជាអង្គការមួយ ដែលមានគម្រោងក្នុងការវាយឈ្លានពាន និងនាំមកនូវការធ្លាក់ចុះក្នុង សង្គម ក្នុងប្រទេសកូរ៉េខាងជើង។ នេះបើយោងតាមការលើកឡើងរបស់អ្នកនាំពាក្យរូបនេះ ដោយមិនបានបញ្ជាក់ ច្បាស់ថា តើកូរ៉េខាងជើងនឹងធ្វើសកម្មភាពបែបណា ឆ្លើយតបនឹងការដាក់ការិល័យឃ្លាំមើលការគោរពសិទ្ធិមនុស្ស នៅកូរ៉េខាងត្បូងនៅឡើយ៕

ទិដ្ឋភាពក្នុងទីក្រុងព្យុងយ៉ាង ពេលរាត្រី

ឧបករណ៍បញ្ចុះសម្ពាធឈាម និង ថែរក្សាខួរក្បាល ម៉ាកធៀនស៍ នេះ គឺបានផលិឡើង តាមបច្ចេកវិទ្យា ដ៏ទំនើប សម្រាប់ ជំនួយការព្យាបាលនិង ថែទាំសុខភាពឲ្យមនុស្ស ដោយប្រើជីវអគ្គិសនី ហើយវិធីព្យាបាលនេះ រួមផ្សំនឹង ទ្រឹស្តីវិជ្ជាពេទ្យ បុរាណចិនជាង ៥០០០ឆ្នាំមុន ដែលគេហៅថាបណ្តាញ ជីពចរ។

លោកអ្នកគ្រាន់តែប្រើនូវ ឧបករណ៍នេះពី៣-៥ នាទីប៉ុណ្ណោះវាអាចជួយសម្រួល សម្ពាធឈាមលោកអ្នក ឲ្យមាន លំនឹង និងជួយបញ្ហាឈឺក្បាល វិលមុខ និងការរំខានពីសារធាតុ វិទ្យុសកម្មផ្សេងៗ

ព័ត៌មានលម្អិតសូម ទាក់ទង តាមរយៈទូរស័ព្ទលេខ៖ 011 65 87 96, 097 51 15 872, 098 44 67 07៕

កំពត ៖ ពីស្រុកឈូកខេត្ដកំពត សម្ដេចតេជោ ហ៊ុន សែន  នាយករដ្ឋមន្ដ្រី នៃរាជរដ្ឋាភិបាលកម្ពុជា បានបញ្ចេញប្រតិកម្មនិងឆ្លើយតប បញ្ជាក់ទៅនឹងពាក្យចរចាមអារាម ក៏ដូចជា ព័ត៌មានមួយចំនួន ដែលបង្ហោះតាមបណ្ដាញ ទំនាក់ទំនងហ្វេកប៊ុកថា សម្ដេចដាច់សរសៃឈាមខួរក្បាលស្លាប់ ។

នៅក្នុងពិធីសំណេះសំណាលជាមួយយោធិនពិការនៅមជ្ឈមណ្ឌលតាកែនកោះស្លា នាព្រឹកថ្ងៃទី១០ ខែមិថុនា ឆ្នាំ២០១៤នេះ សម្ដេចនាយករដ្ឋមន្ដ្រី បានបញ្ជាក់ថា “នេះ គឺហ៊ុន សែន សិប្បនិម្មិតឬមែនទែន ចេះតែ ដើរភូតថ្លុក ភូតត្រពាំង ចេះតែបន់ឱ្យខ្ញុំងាប់ ។ កុំសង្ឃឹមរង់ចាំឱ្យហ៊ុន សែន ងាប់ មិនងាយទេ” ។

សម្ដេចនាយករដ្ឋមន្ដ្រី បានបន្ដទៀតថា “ពូជខ្ញុំមិនមែនពូជក្បត់ជាតិ ពូជឃ្លង់ ពូជរបេង ឬពូជឡប់ អត់មានទេ” ។

ជាមួយគ្នានេះ សម្ដេចតេជោ បានបញ្ជាក់ទៀតថា ប្រសិនបើសម្ដេចស្លាប់ មែននោះ អ្នកឯងគួរតែរកបង្វិចរត់ឱ្យហើយទៅ ដោយសារតែកងកម្លាំងទាំងអស់ នៅក្នុងប្រទេសកម្ពុជា ស្ថិតក្រោមការបញ្ជាផ្ទាល់របស់សម្ដេច ដូច្នេះ បើសម្ដេចស្លាប់នោះ កងកម្លាំងអាច នឹងមិនអត់ឱន ហើយប្រើប្រាស់កម្លាំង ដើម្បីវាយ ។

សម្ដេចតេជោ បានសង្កត់ធ្ងន់ទៀតថា អ្នកដែលបញ្ជាកម្លាំងសរុប គឺមានតែម្នាក់គត់ ហើយបើសម្ដេចស្លាប់ មែននោះ រដ្ឋមន្ដ្រីការពារជាតិ ក៏មិនអាចបញ្ជាកម្លាំងនគរបាល និងកម្លាំងស៊ីវិលបានដែរ ហើយរដ្ឋមន្ដ្រី ក្រសួងមហាផ្ទៃ ក៏មិនអាចបញ្ជាកម្លាំងទ័ព និងកម្លាំងកងរាជអាវុធហត្ថបាននោះទេ ដូច្នេះពេលនេះ គេត្រូវការហ៊ុន សែន ដើម្បី គ្រប់គ្រងសភាពការណ៍ ។

សម្ដេចនាយករដ្ឋមន្ដ្រី បានលើកឡើងថា ព័ត៌មាននិងពាក្យចរចាមអារាមទាំងនេះ ចេញមកពីប្រទេសអូស្ដ្រាលី ហើយសម្ដេច ក៏បានផ្ដាំផ្ញើទៅអ្នកដែលចង់ឱ្យសម្ដេចស្លាប់ គួរថែរទាំសុខភាពរបស់ខ្លួនឱ្យបានល្អទៅបាន ហើយ ហើយធ្វើជាមនុស្សកុំបន់ឱ្យគេស្លាប់។

កំពត  ៖ ឆ្លើយតបទៅនឹងការលើក ឡើងរបស់មេដឹក នាំគណបក្សប្រឆាំង ដែល ប្រាប់អ្នកគាំទ្ររបស់ខ្លួនថា រាជរដ្ឋាភិបាល បដិសេធឱ្យគណបក្សប្រឆាំង បង្កើតស្ថានីយ ទូរទស្សន៍នោះ ត្រូវបានសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបញ្ជាក់ ត្រឡប់ទៅវិញថា រាជរដ្ឋាភិបាល បានអនុញ្ញាត ឱ្យគណបក្សប្រឆាំង បង្កើត ស្ថានីយទូរទស្សន៍ ក្រោមរូបភាពការស្នើសុំពី ក្រុមហ៊ុនឯកជនណាមួយ ។

សម្ដេចនាយករដ្ឋមន្ដ្រី បានបញ្ជាក់ក្នុងពិធីសំណេះសំណាល ជាមួយយោធិនពិការ នៅស្រុកឈូកខេត្ដកំពត នាព្រឹកថ្ងៃទី១០ ខែមិថុនា ឆ្នាំ២០១៤ថា បញ្ហានេះ សម្ដេចបានយល់ព្រមនិងឯកភាព តាំងពីមានការជួបគ្នា រវាងមេដឹកនាំជាន់ខ្ពស់ ទាំងពីរគណបក្ស ក្នុងអំឡុងខែកញ្ញា ឆ្នាំ ២០១៣កន្លងទៅ ប៉ុន្ដែមេដឹកនាំគណបក្សប្រឆាំង បានបំបាត់លទ្ធផលបែបនេះ បែរជាលើកឡើងថា រាជរដ្ឋាភិបាល មិនអនុញ្ញាតឱ្យបង្កើតស្ថានីយទូរទស្សន៍ ។

សម្ដេចតេជោ ហ៊ុន សែន បានបញ្ជាក់ថា “ខ្ញុំឯកភាព ត្រូវតែមានក្រុមហ៊ុនឯកជន មកស្នើសុំពីក្រសួងព័ត៌មាន” ។

ត្រង់ចំណុចនេះ សម្ដេចតេជោ ក៏ធ្លាប់ បានប្រាប់ទៅរដ្ឋមន្ដ្រីក្រសួងព័ត៌មាន លោកខៀវ កាញារីទ្ធ ឱ្យយកហ្វេ្រកង់ ពីស្ថានីយទូរទស្សន៍ជាតិមួយប៉ុស្ដិ៍ មកឱ្យស្ថានីយរបស់គណបក្សប្រឆាំង ដែលស្នើបង្កើតនេះ ។

សម្ដេចនាយករដ្ឋមន្ដ្រី ក៏បានប្រាប់ទៅ អ្នកគាំទ្រគណបក្សប្រឆាំងថា រាជរដ្ឋាភិបាល មិនបានបដិសេធ ឱ្យ គណបក្សប្រឆាំង បង្កើត ស្ថានីយទូរទស្សន៍នោះទេ ប៉ុន្ដែតាមរយៈក្រុមហ៊ុនឯកជន ហើយបើបក្សនយោបាយ ស្នើសុំបង្កើតស្ថានីយទូរទស្សន៍ ដោយខ្លួនឯង នោះបក្សនយោបាយផ្សេងទៀត និងស្នើសុំ ដែរ វាកាន់តែធ្វើ ឱ្យមានបញ្ហា ។

កំពត ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានបញ្ជាក់ថា សម្ដេចបានឯកភាព ឱ្យយកស្ថាប័ន គណៈកម្មាធិការជាតិរៀបចំការបោះឆ្នោត ហៅកាត់ថា គ ជ ប ដាក់បញ្ចូលទៅក្នុងរដ្ឋ ធម្មនុញ្ញ គឺជំពូកទី១៥ ហើយជាមួយគ្នានោះ ការបោះឆ្នោតថ្នាក់ជាតិលើកទី៦ និងប្រព្រឹត្ដទៅនៅឆ្នាំ២០១៨ ដោយគ្មានការកែប្រែ ។

នៅក្នុងពិធីសំណេះសំណាលជាមួយយោធិនពិការ នៅស្រុកឈូក ខេត្ដកំពត នាព្រឹក ថ្ងៃទី១០ ខែមិថុនា ឆ្នាំ២០១៤នេះ សម្ដេច តេជោ ហ៊ុន សែន បានបញ្ជាក់ថា “ឥឡូវខ្ញុំ បានប្រាប់គណបក្សប្រជាជនថា ខ្ញុំឯកភាព ហើយ គឺឯកភាពយក គ ជ ប ដាក់បញ្ចូល ទៅក្នុងជំពូកទី១៥ នៃរដ្ឋធម្មនុញ្ញ ហើយ ធ្វើ វិសោធនកម្ម ”។

សម្ដេចនាយករដ្ឋមន្ដ្រី ក៏បានបញ្ជាក់ទៅ មេដឹកនាំគណបក្សប្រឆាំងថា ចំពោះការលើកឡើង ស្នើសុំដាក់ គ ជ ប ជា ស្ថាប័នធម្មនុញ្ញនោះ គឺវាគ្មានភាសាហ្នឹងទេ មានតែភាសា ដាក់ស្ថាប័ន គ ជ ប នៅក្នុងរដ្ឋ ធម្មនុញ្ញ ។

យ៉ាងណាក៏ដោយ សម្ដេចតេជោ បាន សង្កត់ធ្ងន់ថា ការដាក់បញ្ចូលស្ថាប័ន គ ជ ប នៅក្នុងរដ្ឋធម្មនុញ្ញ ជំពូកទី១៥ នោះ គឺមាន ភារកិច្ចរបស់វា និងមានរបៀបនៃការជ្រើស តាំង “លោកចង់បានអាហ្នឹង ឥឡូវខ្ញុំដាក់ អាហ្នឹងឱ្យ អត់អីពិបាកទេ” ។ ប៉ុន្ដែសូមកុំ ជ្រុលទាញយកការញែកអំណាច ក្រុមប្រឹក្សាធម្មនុញ្ញ ។

សម្ដេចនាយករដ្ឋមន្ដ្រី បានបញ្ជាក់ទៀត ថា នៅក្នុងឱកាសចូលគាល់ព្រះមហាក្សត្រ សម្ដេចបានទូលថ្វាយ ព្រះមហាក្សត្រ នូវសភាពការណ៍ ៣យ៉ាង ប៉ុន្ដែសម្ដេចលើក តែពីរចំណុចមកប្រាប់នោះទេ គឺទី១ បើគណ បក្សប្រឆាំងចូលសភា វាជាការល្អ និងទី២ បើគណបក្សប្រឆាំងមិនចូល គឺគេធ្វើការធម្មតា ហើយការបោះឆ្នោតជ្រើសតាំងតំណាងរាស្ដ្រអាណត្ដីទី៦ និងប្រព្រឹត្ដទៅនៅឆ្នាំ២០១៨ គ្មានការកែប្រែនោះឡើយ ។

សម្ដេចតេជោ ក៏បានព្រមានកុំយកគំរូ ដូចប្រទេសជិតខាង ដោយចាប់ជំរិតនាយករដ្ឋមន្ដ្រី ហើយឡើងកាន់អំណាច ។

ភ្នំពេញ៖ យុវជនម្នាក់ត្រូវបាន ក្រុមក្មេងទំនើង ដេញកាប់ និងគប់ តាមបណ្តោយផ្លូវ៤៨០ ស្ថិតក្នុងសង្កាត់ផ្សារដើមថ្កូវ ខណ្ឌចំការមន បណ្តាឲ្យរងរបួសហូរឈាម ជាច្រើនកន្លែង នៅម៉ោងប្រមាណ ២២ និង៥៥ នាទី ថ្ងៃទី១០ ខែមិថុនា ឆ្នាំ២០១៤ នេះ។

សាក្សីនៅកន្លែងកើតហេតុ មិនបានបញ្ជាក់ពីមូលហេតុ នៃអំពើហិង្សាបង្កដោយ មនុស្សមួយក្រុម នាំគ្នាដេញ កាប់ និងគប់ដំថ្មទៅលើយុវជនរូបនោះទេ ប៉ុន្តែគាត់បានបញ្ជាក់ថា យុវជនរូបនេះរងរបួសជាច្រើន កន្លែង ព្រោះឃើញហូរឈាមជាច្រើន បន្ទាប់ពីរងការកាប់ និងគប់ដោយដុំថ្មពីសំណាក់ក្មេងទំនើងមួយក្រុម។

សាក្សីនៅកន្លែងកើតហេតុបានបន្តទៀតថា មិនត្រឹមតែយុវជនរូបនេះទេ កម្លាំងនគរបាលល្បាត ពីររូបរបស់ប៉ុស្តិ៍ផ្សារដើមថ្កូវ ក៏រៀបនិងត្រូវដុំថ្មរបស់ ក្រុមក្មេងទំនើងមួយក្រុមនេះផងដែរ ប៉ុន្តែសំណាងល្អ នគរបាលទាំងនោះបានគេចរួច។

រហូតមកទល់ពេលនេះ កម្លាំងនគរបាលនៅមិនទាន់អាចប្រាប់អត្តសញ្ញាណជនរងគ្រោះបាននៅឡើយទេ ហើយចំពោះហេតុការណ៍ នៃអំពើហិង្សានេះ ក៏មិនទាន់ត្រូវបានបញ្ជាក់ច្បាស់លាស់នៅឡើយដែរថា បណ្តា មកពីមូលហេតុអ្វី ព្រោះកម្លាំងនគរបាលត្រូវធ្វើការស៊ើបអង្កេតសិន៕

ភ្នំពេញ៖ អង្គការ JICA ដែលមានគម្រោងជួយស្ដារបឹងព្រែកទប់ នៅខេត្តព្រះសីហនុ ហើយបានបញ្ឈប់ទៅវិញ ដោយសារមានបញ្ហាជនខិលខូច ចាក់ដីលុបរំលោភយកបឹងនោះ ប្រហែលជាមានសង្ឃឹមឡើងវិញ ក្នុងការជួយស្តារនេះ។

គេហទំព័រដើមអម្ពិល បានផ្សព្វផ្សាយអំពីបញ្ហាតំបន់បឹងព្រែកទប់ ជាបឹងស្តុកទឹកសាប នៅខេត្តព្រះសី ហនុ ជាច្រើនប្រធានបទរួចមកហើយ ដែលបឹងនេះមានគម្រោងស្ដារជាយូរមកហើយ បន្ទាប់ពីបានសិក្សាលំអិតរួចរាល់កន្លងមក ប៉ុន្តែត្រូវបានអាក់ខានទៅវិញ ដោយសារមានបញ្ហា។

យោងតាមកាសែតកម្ពុជាថ្មី ចុះផ្សាយថ្ងៃទី២៦ ខែឧសភា ឆ្នាំ២០១៤ ដោយដកស្រង់សំដីរបស់មន្ត្រីមន្ទីរឧស្សាហកម្ម និងសិប្បកម្មខេត្តព្រះសីហនុ បានប្រាប់ឲ្យដឹងថា អង្គការ JICA ជប៉ុន ដែលបានសិក្សា អំពីគម្រោងស្តារបឹងព្រែកទប់ ដែលជាអាងស្តុកទឹកសាបរួចរាល់អស់ហើយនោះ និងរង់ចាំ តែធ្វើសកម្មភាពស្តារ ទំនងជាត្រូវផ្អាកទៅវិញ បើសិនជាភាពស្មុគ្រស្មាញនៅជុំវិញបឹង មិនមានការដោះស្រាយ ឲ្យបានច្បាស់លាស់ទេនោះ ពីព្រោះ អ្វីដែលកំពុងកើតមានឡើង បែបអនាធិបតេយ្យក្នុងបឹងព្រែកទប់នេះ វាជាផលប៉ះពាល់ដល់គម្រោងស្តារបឹង។

ប្រភពព័ត៌មានដដែលបានបន្តថា គោលដៅនៃការស្តារ បឹងព្រែកទប់ឡើងវិញរបស់អង្គការ JICA នេះ គឺចង់រក្សាការពារបឹងព្រែកទប់ឲ្យបាន គង់វង្ស យូរអង្វែងសម្រាប់ ការផ្គត់ផ្គង់ទឹកសាបតែមួយគត់ ក្នុងក្រុងព្រះសីហនុនាពេលបច្ចុប្បន្ន និងអនាគត ហើយគម្រោងនេះ អង្គការជប៉ុន JICA បាន សិក្សាលំអិតរួចហើយស្តីពី ផលប៉ះពាល់ អនាម័យ និងបរិស្ថាន និងមិនអនុញ្ញាតឲ្យមានការរស់នៅ សង់ផ្ទះសម្បែងជុំវិញមាត់បឹង ប៉ុន្តែសម្រាប់ ពេលនេះ ដីនៅជុំវិញ មាត់បឹងត្រូវបានគេឃុបឃិតគ្នា ចេញបណ្ណកម្មសិទ្ធិកាន់កាប់អស់ទៅហើយ ព្រមទាំងចាក់ដីលុបគ្មានញញើត កោតក្រែង និង គ្មានសេចក្តីអៀនខ្មាសអ្វីទេ គឺវាផ្ទុយទៅនឹងគម្រោង ដែលបានសិក្សាគិតទុកជាមុន។ ដូចនេះ ផែនការស្តារ បឹងព្រែកទប់របស់ អង្គការជប៉ុន JICA ទំនងជាត្រូវផ្អាកវិញ។

ប៉ុន្តែមកដល់ពេលនេះ អង្គការ JICA របស់ជប៉ុន ប្រហែលជាមានសង្ឃឹមឡើងវិញ ក្នុងស្ដារបឹងព្រែកទប់ នៅខេត្តព្រះសីហនុ ពីព្រោះរាជរដ្ឋាភិបាល កម្ពុជា បានបញ្ជូនអនុរដ្ឋលេខាធិការ ក្រសួងបរិស្ថានចំនួនពីរ រូប គឺលោក ស៊ូ សូវុធ និងលោក ប៉ុន សារឿន ឲ្យចុះទៅពិនិត្យដីនៅតំបន់បឹងព្រែក ទប់នេះ។ តាមប្រភពពីភ្នាក់ងារ របស់មជ្ឈមណ្ឌលព័ត៌មានដើមអម្ពិល ប្រចាំនៅខេត្តព្រះសីហនុ បានឲ្យដឹងថា ប្រជាពលរដ្ឋ និងមន្ត្រីរាជការនៅ ខេត្តនេះ ដែលស្រឡាញ់ភាពស្អាតស្អំ និងយុត្តិធម៌ មានសង្ឃឹមយ៉ាងខ្លាំងទៅលើអនុរដ្ឋលេខាធិការទាំងពីរ ក្នុងការជួយបឹងព្រែកទប់ ពីព្រោះលោក ជាមន្ត្រីអប់រំផ្នែកបរិស្ថាន ហើយក៏មិនធ្វើឲ្យរាជរដ្ឋាភិបាល និងក្រសួងបរិស្ថានអស់សង្ឃឹមដែរ។ ប្រភពក្រៅផ្លូវការ បានឲ្យមជ្ឈមណ្ឌលព័ត៌មាន ដើមអម្ពិល ដឹងថា រាជរដ្ឋាភិបាលកម្ពុជា ប្រហែលទុកឲ្យប្រជាពលរដ្ឋ រស់នៅក្នុងតំបន់នេះតែ ៥១គ្រួសារ ស្មើនឹង១១០ក្បាលដី ដែលមានទីលំនៅ ជាក់ ស្តែងមុនគេជាយូរមកហើយប៉ុណ្ណោះ ភាគច្រើនជាគ្រួសារមន្ត្រីអង្គភាពរដ្ឋាករទឹក ស្ថិតនៅជិតវត្តឥត្តញ្ញណ និងជិតអង្គភាពរដ្ឋាករទឹក ដែលនៅ ឆ្ងាយ ពីបឹងព្រែកទប់ ក្រៅពីនេះ គឺរាជរដ្ឋាភិបាលយកវិញទាំងអស់។

តាមរបាយការណ៍ របស់មន្ទីរឧស្សាហកម្ម និងសិប្បកម្មខេត្តព្រះសីហនុ បានឲ្យដឹងថា ប្រភពទឹករបស់អង្គភាពរដ្ឋាករទឹក គឺមានបឹងព្រែកទប់ទំហំ ១៥ហិកតា អាចស្តុកទឹកបាន ៥០ម៉ឺនម៉ែត្រគូប ហើយបឹងនេះ តែងតែរីងស្ងួតនៅចុងខែមីនា ធ្វើឲ្យមានការខ្វះខាតទឹកប្រើប្រាស់ក្នុងតំបន់ ខណៈដែលតម្រូវការទឹកនៅតំបន់នេះ ក្នុងខែប្រាំង ក្នុងមួយថ្ងៃមានចំនួន ១៣ពាន់ម៉ែត្រគូប។ 

ទៅអនាគត ប្រជាពលរដ្ឋនៅក្នុងក្រុងព្រះសីហនុ កើតកូនពូនជាចៅ ពិតណាស់គឺកើនឡើងចំនួន ចំណែកភ្ញៀវទេសចរណ៍ក៏កើនឡើងដែរ ដូច្នេះ អាជ្ញាធរដែនដី ក៏ដូចមន្ត្រីជំនាញ ត្រូវស្តារផ្ទៃបឹង ពង្រីកបន្ថែម និងទុកផ្ទៃរងទឹកភ្លៀងឲ្យកាន់តែច្រើនថែមទៀត មិនគួរបោកប្រាស់រាជ រដ្ឋាភិបាល ដោយបំប៉ោងតួលេខគ្រួសារ និងក្បាលដីដ៏ច្រើន រហូតដល់ ២៣០ក្បាលដី ដោយចេញប្លង់កម្មសិទ្ធិកាន់កាប់ដីធ្លីនៅតាមមាត់បឹង ដូចបច្ចុប្បន្ននេះ ឡើយ។ មន្ត្រីខិលចូច មានលោក ស្បោង សារ៉ាត អតីតអភិបាលខេត្តព្រះសីហនុ, លោក ប្រាក់ ស៊ីហារ៉ា អភិបាលរងខេត្តព្រះសីហនុ, លោក ហ៊ុន ភី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ, លោក ហេង ហ៊ុយ ជាឈ្មួញអ្នកមានទ្រព្យសម្បត្តិ នៅខេត្ត ព្រះសីហនុ។

បឹងព្រែកទប់ តែងតែរីងស្ងួតនៅចុងខែមីនា នាំឲ្យខ្វះខាតទឹកសាបប្រើប្រាស់ វាសមល្មមសម្រាប់អាជ្ញាធរ និងមន្ត្រីជំនាញខិលខូច ខេត្តព្រះសីហនុ ដឹងខ្លួនក្នុងការស្តារ និងពង្រីកផ្ទៃបឹងហើយ ឬមួយចាំឲ្យដល់ពេលមានបញ្ហាដូច ខេត្តកោះកុង ទើបភ្ញាក់ខ្លួន? ខេត្តកោះកុង គឺជាខេត្តជាប់សមុទ្រ ដូចគ្នានឹងខេត្តព្រះសីហនុដែរ ដូច្នេះបញ្ហាត្រូវការទឹកសាបប្រើប្រាស់ ជាមានការលំបាកមិនខុសគ្នាឡើយ។ លិខិតរបស់ ក្រុមហ៊ុន អិល វ៉ាយ ភី (L.Y.P.) គ្រុប ចុះថ្ងៃទី២២ ខែឧសភា ឆ្នាំ២០១៤ ជម្រាបជូនមន្ទីរឧស្សាហកម្ម និងសិប្បកម្ម ខេត្តកោះកុង បានឲ្យដឹងថា ការផ្គត់ផ្គង់ទឹកស្អាតរបស់ រដ្ឋាករទឹកកោះកុង នឹងត្រូវផ្អាកជា  បណ្តោះអាសន្ន រង់ចាំទឹកស្រះកើនបន្តិច ទើបធ្វើការផលិតឲ្យប្រើប្រាស់ ប្រក្រតីឡើងវិញ។មូលហេតុខ្វះខាតទឹក គឺដោយសារតែបញ្ហាអាកាសធាតុ និងចំនួនអ្នកប្រើប្រាស់កើនឡើង ហើយទោះបីជាក្រុមហ៊ុន បានខិតខំផលិតទឹកស្អាត នៅស្រះរដ្ឋាករទឹកចាស់ មកជួយបន្ថែមមួយកន្លែងទៀត ក៏នៅតែខ្វះដែរ។ ការខ្វះទឹកស្អាតប្រើប្រាស់នៅក្នុងរដូវប្រាំងនេះ ប្រជាពលរដ្ឋនៅខេត្តកោះកុង បានឲ្យដឹងថា មាន រយៈពេល៣ឆ្នាំជាប់ៗគ្នាមកហើយ រួចក្រុមហ៊ុនបានបូមទឹកស្រះ ដែលមានពណ៌ក្រហម ក្លិនស្អុយ ងួតទៅបណ្តាលឲ្យកើតរមាស់ នាំឲ្យ ប្រជាពលរដ្ឋ កើតជំងឺ និងប៉ះពាល់ដល់ការប្រកបមុខ របរចិញ្ចឹមជីវិតរបស់ពួកគាត់។

សូមរលឹកថា កាលអំឡុងពេលចូលរួមប្រជុំ ជាមួយគណៈអភិបាលខេត្ត ក្រុមប្រឹក្សាខេត្ត តំណាងសាលា ដំបូងខេត្ត ព្រះរាជអាជ្ញា និងប្រធានមន្ទីរ អង្គភាពពាក់ព័ន្ធជាច្រើនរូបទៀត នៅឯសាលប្រជុំ សាលាខេត្ត ព្រះសីហនុ នៅព្រឹកថ្ងៃទី៣ ខែមិថុនា ឆ្នាំ២០១៤នេះ លោក ប៊ិន ឈិន ឧបនាយក រដ្ឋមន្រ្តី និងជា ប្រធានអាជ្ញាធរជាតិ ដោះស្រាយទំនាស់ដីធ្លី បានណែនាំឲ្យលោក ឈិត សុខុន អភិបាលខេត្តព្រះសីហនុ ទើបឡើងជំនួសលោក ស្បោង សារ៉ាត ធ្វើយ៉ាងណា ត្រូវតែការពារបឹងព្រែកទប់ និងព្រៃនៅតំបន់ក្បាលឆាយឲ្យបាន ដោយទុកជាស្នាដៃទី១ នៃការគ្រប់គ្រងរបស់លោក ដោយធ្វើការសហការ ជាមួយសាលាដំបូងខេត្ត ព្រះរាជអាជ្ញាអមសាលាដំបូងខេត្ត និងសមត្ថកិច្ចពាក់ព័ន្ធដទៃទៀតឲ្យបាន។

លោកឧបនាយករដ្ឋមន្រ្តី ប៊ិន ឈិន ក៏បានសង្កត់ធ្ងន់ បញ្ជាក់ប្រាប់អង្គប្រជុំផងដែរថា កាលជំនាន់លោក ស្បោង សារ៉ាត នៅជាអភិបាលខេត្ត ព្រះសីហនុ សម្តេចតេជោ ហ៊ុន សែន ប្រមុខរាជរដ្ឋាភិបាល ធ្វើការជេរស្តីច្រើនណាស់ គឺឲ្យតែពេលជួប គឺលោកនិយាយហើយពីរឿងហ្នឹង។

ក្នុងពិធីផ្លាស់ប្តូរអភិបាលខេត្តព្រះសីហនុ នៅព្រឹកថ្ងៃទី៨ ខែឧសភា ឆ្នាំ២០១៤ នៅឯ សាលប្រជុំធំ សាលាខេត្តព្រះសីហនុ លោក ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានប្រាប់ឲ្យអាជ្ញាធរខេត្តព្រះសីហនុ ត្រូវតែថែរក្សា បឹងព្រែកទប់ និងព្រៃជុំវិញឲ្យបានល្អ បើថែរក្សាមិនបានទេ វារលាយហើយកំពង់សោមនោះ ។

លោកឧបនាយករដ្ឋមន្រ្តី បានសង្កត់ធ្ងន់ថា ដាច់ខាត ត្រូវរក្សាឲ្យបានចំពោះបឹងព្រែកទប់នេះ ព្រោះ ខេត្តព្រះសីហនុ គឺជាខេត្តទេសចរណ៍ និងជាប៉ូលសេដ្ឋកិច្ចមួយយ៉ាងសំខាន់ ដោយសារកំណើនប្រជាពលរដ្ឋ មានការកើនឡើងជាលំដាប់ ជាពិសេសភ្ញៀវទេសចរជាតិ និងអន្តរជាតិ តែងតែធ្វើដំណើរមកកំសាន្ត នៅក្រុងព្រះសីហនុយ៉ាងច្រើន។

លោកឧបនាយករដ្ឋមន្រ្តី ក៏បានបញ្ជាក់ផងដែរថា កន្លងមកក្រុងព្រះសីហនុ ជួបប្រទះរួចហើយ ពីកង្វះទឹកស្អាត ដោយត្រូវធ្វើយ៉ាងណា ពេល ភ្ញៀវទេសចរ មកមុជទឹកសមុទ្រ ហើយត្រូវមានទឹកស្អាត ងូតលាងសំអាតខ្លួនផងដែរ។ លោកឧបនាយករដ្ឋមន្រ្តី បានលើកជាវិធានការថា ទី១- ហាមទៅប៉ះពាល់     បឹងព្រែកទប់ឲ្យសោះ, ទី២-ត្រូវមានវិធានការ ស្តារបឹងឡើងវិញផងដែរ ទើបអាចរក្សាទឹក និងព្រៃជុំវិញនោះបាន។ បើមិនដូច្នេះ ទេ ខេត្តនេះ នឹងលែងក្លាយទៅជា ប៉ូលសេដ្ឋកិច្ចទៀតហើយ៕

ភ្នំពេញ៖ បុរសជាប់ចោទ ជនជាតិអាមេរិក កំាងម្នាក់ ដែលមានតួនាទីជាប្រធានអង្គការ Hope Transitions ត្រូវបាន តុលាការក្រុងភ្នំពេញ កាលពីរសៀល ថ្ងៃ ទី ១០ ខែមិថុនា ២០១៤ ប្រកាសសាលក្រម សម្រេច ផ្តន្ទាទោសដាក់ពន្ធនាគាររយៈពេល ១ឆ្នាំ និង ពិន័យជាប្រាក់ចំនួន៤លានរៀល (ប្រមាណ១០០០$) សម្រាប់ ដាក់ចូលក្នុងថវិកាជាតិ ជាប់ពាក់ព័ន្ធនឹង ករណីប្រព្រឹត្តអាស និងបៀតបៀនផ្លូវភេទ ទៅលើក្មេងប្រុសខ្មែរ ចំនួន៥នាក់ ដែលជាកុមារាក្រីក្ររស់ និងស្នាក់នៅ ក្នុងមណ្ឌលកុមារកំព្រា អង្គការ Hope Transitions របស់គាត់ ដែលមានទីតាំង ក្នុងសង្កាត់បឹងទំពុន ខណ្ឌមានជ័យ កាលពីឆ្នាំ២០១៣។

លោកគឹម រ័ត្នណារិន ចៅក្រមជំនុំជម្រះ នៃសាលាដំបូងរាជធានីភ្នំពេញ បានឲ្យដឹងថា ជនជាប់ចោទរូបនេះ មានឈ្មោះ Daniel Stephen Johnson ភេទប្រុស អាយុ ៣៦ឆ្នាំ ជនជាតិអាមេរិកកាំង មានមុខរបរជា ប្រធានអង្គការ Hope Transitions។ ជនជាប់ចោទ ត្រូវបានចោទប្រកាន់ពីបទ«អំពើអាសប្រឆាំងនឹង អនីតិជនក្រោម អាយុ១៥ឆ្នាំ» តាមមាត្រា៤៣ នៃ ច្បាប់ស្តីពីការបង្ក្រាបអំពើជួញដូរមនុស្ស និង អំពើ អាជីវកម្មផ្លូវភេទ កម្ពុជា។

លោកចៅក្រមបានបញ្ជាក់ថា ឈ្មោះ Daniel ឈ្មោះ Daniel Stephen Johnson ត្រូវបានឃាត់ខ្លួន ដោយនគរបាលប្រឆាំងការជួញដូរ មនុស្ស និងការពារអនីតិជនក្រសួងមហាផ្ទៃ សហការជាមួយកម្លាំង FBI  អាមេរិក នៅក្នុងមណ្ឌលកុមារកំព្រា នៃ អង្គការ Hope Transitions របស់គាត់ ដែលមានទីតាំងស្ថិតនៅ ក្នុងភូមិសន្សំកុសល៣ សង្កាត់បឹងទំពុន ខណ្ឌមានជ័យ កាលពីព្រឹកថ្ងៃទី ៩ ខែ ធ្នូ ២០១៣។ ជនជាប់ចោទ ត្រូវបានឃាត់ខ្លួន បន្ទាប់ពីបានប្រព្រឹត្តប្រព្រឹត្តអំពើបៀតបៀនផ្លូវភេទ ទៅលើក្មេងប្រុសខ្មែរ អាយុក្រោម ១៥ ចំនួន៥នាក់ តាមរយៈ ហៅក្មេងរងគ្រោះ ចូលក្នុងបន្ទប់ឲ្យម៉ាស្សាឲ្យគាត់ តែ បានធ្វើសកម្មភាពចាប់ស្ទាប និង លេងប្រដាប់ភេទ (ពងក្តរ) របស់ក្មេងប្រុសរងគ្រោះ និង ឲ្យពួកគេទាំងនោះ លេងប្រដាប់ភេទគាត់វិញ ម្តង៕

បន្ទាយមានជ័យ ៖ ក្រោយពីប្រទេសថៃ ត្រូវបានគ្រប់គ្រង ដោយរបបយោធា រួចមក នៅតាមបណ្តា ព្រំដែនរវាង ប្រទេសកម្ពុជា និងថៃ មានការរឹតបណ្តឹង ខ្លាំងឡើងៗ ជាពិសេសនោះ គឺការធ្វើដំណើរ ចូលប្រទេសថៃតែម្តង ទាំងច្រកទ្វារអន្តរជាតិ និងច្រករបៀង ដែលទាំងនេះ បង្ហាញនូវការព្រួយបារម្ភ មួយទៀត ជាពិសេស ចំពោះប្រជាពលរដ្ឋខ្មែរ ដែលរកស៊ី និងធ្វើការនៅ ក្នុងប្រទេសថៃដោយខុសច្បាប់ ។

ជាក់ស្តែង កត្តានយោបាយ នៅក្នុងប្រទេសថៃ ដែលដឹកនាំដោយ របបយោធាខាងលើនេះ បានធ្វើឲ្យពលករខ្មែរ ទាំងប្រុស ទាំងស្រី ទាំងចាស់ ទាំងក្មេង មិនថាធ្វើការនៅ តាមខេត្តណានោះទេ បាននាំគ្នាសម្រុក ចេញពីថៃ ដូចទឹកបាក់ទំនប់ ដោយបានធ្វើដំណើរ តាមរថយន្តជាច្រើនគ្រឿង និងតាមច្រកទ្វារ មួយចំនួន ទាំងនៅខេត្តបន្ទាយមានជ័យ និងនៅខេត្តបាត់ដំបង។

ការលំហូរចូលមក ស្រុកកំណើតខាងលើនេះ ត្រូវបានគេរាយការណ៍ថា ខ្លះត្រូវបានអាជ្ញាធរថៃ និងសមត្ថកិច្ចថៃ ចាប់បញ្ជូនមកវិញ ចំពោះពលករខ្មែរទាំងឡាយណា ដែលធ្វើការដោយ ខុសច្បាប់ និងកត្តាមួយទៀតនោះ គឺប្រជាពលរដ្ឋខ្មែរ ខ្លួនឯង មានការភ័យខ្លាច ពីសុវត្ថិភាព ក្រោយពីម្ចាស់ផ្ទះជួល មិនធានាចំពោះការស្នាក់នៅ របស់ពួកគេ។

ការសម្រុកចេញពីថៃ តាមរថយន្តជាច្រើនគ្រឿង ខាងលើនេះ ត្រូវបានគេឃើញមានកើតឡើងកាលពី យប់ថ្ងៃទី៩ ខែមិថុនា ឆ្នាំ២០១៤ និងបន្តមកដល់ រសៀល និងយប់ថ្ងៃទី១០ ខែមិថុនា ឆ្នាំ២០១៤នេះ។

មន្រ្តីអាវុធហត្ថ ក្រុងប៉ោយប៉ែត ខេត្តបន្ទាយមានជ័យ បានថ្លែងឲ្យដឹងថា បើគិតពីចំនួន ពលករខ្មែរ ដែលមកខ្មែរវិញ ចាប់តាំងពីយប់ថ្ងៃទី៩ ខែមិថុនា រហូតដល់ម៉ោង ប្រមាណ ១០ព្រឹកថ្ងៃទី១០ ខែមិថុនា ឆ្នាំ២០១៤ មានប្រមាណ១ម៉ឺននាក់ ទៅហើយ ដោយធ្វើដំណើរ តាមរថយន្តជាង ៥០គ្រឿងឯណោះ ហើយការធ្វើដំណើររបស់ ពួកគេនេះ គឺឆ្លងកាត់ច្រកទ្វារ អន្តរជាតិប៉ោយប៉ែត ។

ដោយឡែក ស្នងការនគរបាល ខេត្តបន្ទាយមានជ័យ លោកឧត្តមសេនីយ៍ត្រី អាត់ ខែម បានបញ្ជាក់ថា គិតត្រឹមវេលាម៉ោង ប្រមាណ ៣៖២០នាទីរសៀលថ្ងៃទី១០ ខែមិថុនា ឆ្នាំ២០១៤នេះ ចំនួនពលករខ្មែរ ដែលធ្វើដំណើរមក ប្រទេសកម្ពុជា មានប្រមាណ ៧០០នាក់ តាមរថយន្តចំនួន១៧គ្រឿង ។

បើតាមលោកឧត្តមសេនីយ៍ ស្នងការ មូលហេតុ ដែលនាំឲ្យពលករខ្មែរសម្រុក ចេញមកវិញនេះ គឺក្រោយពីម្ចាស់ផ្ទះជួល របស់ពួកគាត់មិនបានធានាសុវត្ថិភាព ក្នុងការរស់នៅ របស់ពួកគាត់ ។

ស្នងការនគរបាលរូបនេះ បានបញ្ជាក់ថា ក្រោយពីបានធ្វើដំណើរ មកដល់ក្រុងប៉ោយប៉ែត ហើយកម្លាំងនគរបាល របស់លោក នៅក្រុងប៉ោយប៉ែត និងអាជ្ញាធរពាក់ព័ន្ធ បានធ្វើការសម្របសម្រួល ហើយអនុញ្ញាតឲ្យ ត្រឡប់ទៅផ្ទះវិញរៀងៗខ្លួន។

ដោយឡែក សេចក្តីរាយការណ៍ ពីមន្រ្តីនគរបាល នៅច្រកភ្នំដី ស្រុកសំពៅលូន ខេត្តបាត់ដំបង បានឲ្យដឹងថា ចំនួនពលករ ដែលធ្វើដំណើរ តាមច្រកមួយនេះ ក៏បានកើតឡើង ជាហូហែរដែរ ។ មន្រ្តីនគរបាល នៅច្រកទ្វារមួយនេះ បានបញ្ជាក់ថា ចំនួនពលករដែលឆ្លងកាត់ មកស្រុកខ្មែរវិញ ទាំងក្មេង ទាំងចាស់ ទាំងស្រី ទាំងប្រុស មានជិត៣០០នាក់ ។

ជាមួយនឹងការវិលត្រឡប់ មកស្រុកកំណើតវិញដោយសារតែ វិបត្តិនយោបាយ នៅក្នុងប្រទេសខាងលើនេះ មានការព្រួយបារម្ភថា ពលករទាំងនេះអាចប្រឈមមុខនឹងការ អត់ការងារធ្វើ ហើយបើមានការងារធ្វើ តែទទួលបានប្រាក់ខែមិនច្រើន ដូចអ្វីដែលពួកគេបានធ្វើនៅ ក្នុងប្រទេសថៃ ៕

ពលករខ្មែរដែលធ្វើដំណើរ តាមច្រកទ្វារ ប៉ោយប៉ែត ខេត្តបន្ទាយមានជ័យ

ពលករខ្មែរដែល ធ្វើដំណើរតាមច្រកទ្វារភ្នំដី នៅស្រុកសំពៅលូន ខេត្តបាត់ដំបង

ភ្នំពេញៈ កាលពីព្រឹកថ្ងៃ ទី ១០ ខែ មិថុនា ២០១៤នេះ  សាលាដំបូង រាជធានីភ្នំពេញ បានប្រកាសសាលក្រម ផ្តន្ទាទោស ស្រ្តីប្រកបមុខរបរ កត់កន្ទុយលេខឆ្នោត ចំនួន២នាក់  ដាក់គុកពួកគេ ម្នាក់ៗរយៈពេល១ឆ្នាំ តែអនុវត្តទោស នៅក្នុង ពន្ធនាគាររយៈពេលតែ ២០ថ្ងៃ ប៉ុណ្ណោះទោសនៅសល់គឺ ត្រូវព្យួរទាំងអស់ ក្រោមការចោទ ប្រកាន់ពីបទ បើកល្បែងស៊ីសងខុសច្បាប់  ប្រព្រឹត្តនៅក្នុងផ្សារបូរីទឹកថ្លា ភូមិចុងថ្នល់ខាងលិច  សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីថ្ងៃ ទី ២៦ ខែឧសភា ឆ្នាំ២០១៤។ 

លោកអ៊ី ឋាវរៈ ចៅក្រម នៃសាលាដំបូងរាជធានីភ្នំពេញ បានឲ្យដឹងថា ជនជាប់ចោទទាំង២នាក់ នេះ មានឈ្មោះ ស៊ីន ស៊ីណេត ភេទស្រី អាយុ៤២ឆ្នាំ និង ទី ឈ្មោះ ឆេន គិនណូរ៉ុន ភេទស្រី អាយុ៣២ ឆ្នាំ។ ពួកគេត្រូវ បានតុលាការ ផ្តន្ទាទោស ដាក់ពន្ធនាគារម្នាក់ៗ រយៈពេល១ឆ្នាំ តែអនុវត្តទោសនៅក្នុងពន្ធនាគាររយៈពេលតែ ២០ថ្ងៃ ទោសនៅសេសសល់ត្រូវព្យួរទាំងអស់។  

លោកចៅក្រមបានបន្ថែមថា ពួកគេត្រូវបានតំណាងអយ្យការ ចោទប្រកាន់ពីបទ «ល្បែងស៊ីសងខុសច្បាប់» តាមមាត្រា៥ នៃ ច្បាប់ស្តីពីការបង្រ្កាបអំពីល្បែងស៊ីសង និង ត្រូវបានចាប់ឃាត់ខ្លួន នៅក្នុងផ្សារបូរីទឹកថ្លា ភូមិចុងថ្នល់ខាងលិច  សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីព្រឹក ថ្ងៃ ទី ២៦ ខែ ឧសភា ឆ្នាំ២០១៤៕

កណ្តាល៖ ប្រជាពលរដ្ឋមួយគ្រួសារ ដែលមានសមាជិក៨នាក់ ក្នុងនោះម្នាក់បានស្លាប់ និង៧នាក់ទៀត រងរបួសធ្ងន់ ហើយត្រូវបានគេបញ្ជូនទៅសង្គ្រោះ ដោយសារតែពុលត្រីកំពត ខណៈដែលពួកគេ ធ្វើការនេសាទបាន ហើយយកមកបរិភោគជាអាហារ។ ហេតុការណ៍នេះបានកើតឡើង កាលពីវេលាម៉ោង៩ ថ្ងៃទី១០ ខែមិថុនា ឆ្នាំ២០១៤ ស្ថិតក្នុងភូមិតាកែវទី២ ឃុំវិហារសួគ៍ ស្រុកខ្សាច់កណ្តាល ខេត្តកណ្តាល។

ប្រភពព័ត៌មានបានឲ្យដឹងថា ជនរងគ្រោះមាន៨នាក់ ១- ឈ្មោះ រឿន ធឿន ភេទប្រុស អាយុ៤៥ឆ្នាំ មុខរបរកសិករ ព្យាបាលនៅមន្ទីរពេទ្យភ្នំពេញ (ស្លាប់) ២- ឈ្មោះក្រូច យុត ភេទស្រី អាយុ៤២ឆ្នាំ មុខរបរ កសិករ ត្រូវបានបញ្ជូនទៅព្យាបាលនៅភ្នំពេញ ៣.ឈ្មោះវ៉ៃ តូលីន ភេទប្រុស អាយុ១៣ឆ្នាំ ជាកូន ក្រូច យុត កំពុងសម្រាកព្យាបាលនៅពេទ្យឃុំ ៤- ឈ្មោះក្រូច សុខលី ភេទស្រីអាយុ ៣៧ឆ្នាំ មុខរបរកសិករ ជាប្អូន ត្រូវបានបញ្ជូនទៅព្យាបាលនៅភ្នំពេញ ៥- ឈ្មោះក្រូច សុខលាង ភេទស្រី អាយុ៣៥ឆ្នាំ មុខរបរកសិករ ប្អូន កំពុងសម្រាកព្យាបាលនៅមន្ទីរពេទ្យឃុំ ៦- ឈ្មោះថា ឆវី ភេទស្រីអាយុ១៩ឆ្នាំ មុខរបរកសិករ ព្យាបាលនៅមន្ទីរ ពេទ្យ ឃុំ  ៧- ឈ្មោះប៉េង ឌីម ភេទប្រុសអាយុ៤៥ឆ្នាំ (កសិករ) ព្យាបាល នៅមន្ទីពេទ្យឃុំ ៨- ឈ្មោះរំ ណារិន ហៅ យ៉ាំ ភេទស្រី អាយុ១៩ឆ្នាំ មុខរបរកសិករ ព្យាបាលនៅមន្ទីរពេទ្យភ្នំពេញ អ្នកទាំង៨នាក់  រស់នៅក្នុងភូមិឃុំ
កើតហេតុខាងលើ។

ប្រភពព័ត៌មានបានឲ្យដឹងទៀតថា នៅព្រឹកកើតហេតុ ជនរងគ្រោះឈ្មោះ ខេង រុំ ឈ្មោះនួន វៃ នឹង
ឈ្មោះប៉ិ វី បាននាំគ្នាទៅរកត្រីនៅចំណុចទំនប់ព្រា ភូមិព្រៃចាស់ ឃុំវិហារសួគ៍ ក៏រកត្រីកំពតបាន៣គីឡូក្រាម ហើយអោយប្រពន្ធ យកមកធ្វើម្ហូបហូប នៅឯផ្ទះវេលាម៉ោង៩ ព្រឹក លុះដល់វេលាម៉ោង១២ ក៏ធ្វើទុកមាន ក្អួតចង្អោ ហើយត្រូវបានអ្នកភូមិបញ្ជូនទៅព្យាបាលនៅមន្ទីរពេទ្យភ្នំពេញ ។ ចំណែកឈ្មោះរឿន ធឿន បានស្លាប់នៅមន្ទីរពេទ្យកាល់ម៉ែត៕

ភ្នំពេញ ៖ ពិតណាស់ សម្រាប់ប្រទេសកម្ពុជា នាពេលបច្ចុប្បន្ន ស្ថិតនៅក្នុង ដំណាក់កាល កំពុងអភិវឌ្ឍន៍ លើគ្រប់វិស័យ ក្នុងនោះ គេមិនអាចបំភ្លេច ចោលនូវវិស័យអប់រំនោះឡើយ ដែលកត្តានេះ នាំឲ្យប្រជាពលរដ្ឋខ្មែរ ជាពិសេស ក្មេងជំនាន់ក្រោយ មានឱកាសគ្រប់គ្រាន់ ដើម្បីក្រេបយកចំណេះដឹង និងការហាត់រៀន នាំដំណើរជីវិត របស់ពួកគេ ទៅរកភាពជោគជ័យ និងភ្លឺថ្លា ។

ដើម្បីសម្រេចបាននូវ គោលបំណង ទាំងនេះ ក្រុមយុវជន យុវនារី បូករួមទាំង ឪពុកម្តាយ របស់ពួកគេ តែងតែស្វែងរក ទីបណ្តុះបណ្តាលដែលល្អ និងមានគុណភាព ព្រមទាំងទទួល ស្គាល់ខ្លាំង ទាំងជាតិ និងអន្តរជាតិ គឺដើម្បីងាយស្រូលស្វែងរក ការងារធ្វើ ពេលបញ្ចប់ការសិក្សា ។

ជាក់ស្តែង នៅកម្ពុជាបច្ចុប្បន្ន ថ្នាក់សកលវិទ្យាល័យទាំងរដ្ឋ និងឯកជន មានការកើនឡើងជាង១០០ទីតាំង (តាមការបញ្ជាក់ របស់រដ្ឋមន្រ្តី ក្រសួងអប់រំ លោក ហង់ ជួនណារ៉ុន) ដើម្បីរង់ចាំ ទទួលការដាក់ពាក្យចូលពាក្យ ចូលរៀន និងប្រឡងពីសំណាក់ ក្រុមសិស្ស ដែលប្រឡងជាប់សញ្ញាប័ត្រមធ្យមសិក្សាទុតិយភូមិ (បាក់ឌុប) ដែលមានចំនួន រាប់ម៉ឺននាក់ ក្នុងមួយឆ្នាំៗ ។

និសិ្សតគ្រប់រូប តែងតែធ្វើការជ្រើសរើស សកលវិទ្យាល័យណាមួយ ដែលខ្លួនគិតថា មានគុណភាពល្អ កេរ្តិ៍ឈ្មោះល្បី ទាំងជាតិ និងអន្តរជាតិ ហើយជាពិសេសនោះ សម្រាប់និស្សិតមានជីវ ភាពមធ្យម គឺគិតទៅលើតម្លៃ សេវាប្រចាំឆ្នាំ ក្នុងករណីខ្លួន មិនបានជាប់អាហារូបករណ៍ ។ សកលវិទ្យាល័យ នីមួយៗ ដែលកំពុងបង្ហាញ វត្តមាន នៅក្នុងប្រទេសកម្ពុជា តែងតែមាន យុទ្ធសាស្រ្ត និងវិធិសាស្រ្តា បង្រៀនរៀងៗខ្លួន និងការផ្សព្វផ្សាយ ធ្វើយ៉ាងណាឲ្យមានការចាប់អារម្មណ៍ ពីសំណាក់ក្រុមសិស្ស ដែលទើបជាប់បាក់ឌុប ដើម្បីមករៀននៅ សាលារបស់ខ្លួន ទាំងនេះពួកគេតែងតែ គិតអំពីបញ្ហាតម្លៃ បញ្ហាគុណភាពជាដើម ។

ធ្លាប់តែចាប់អារម្មណ៍ និងស្គាល់ ឈ្មោះសកលវិទ្យាល័យ មួយចំនួន នៅកម្ពុជា ដែលបង្ហាញវត្តមាន ជាយូរណាស់មកហើយនោះ ឥឡូវសិស្ស និស្សិត សូមងាកមកចាប់អារម្មណ៍ សកលវិទ្យាល័យថ្មីមួយទៀត ដែលបានបង្ហាញវត្តមាន នៅក្នុងប្រទេសកម្ពុជា រយះជាងពេលមួយឆ្នាំនោះ គឺ សកលវិទ្យាល័យ អាម៉េរិកាំង ភ្នំពេញ ហៅថា AUPP ដែលមានទីតាំង ស្ថិតនៅជាប់ មជ្ឈមណ្ឌល ទួលគោក ក្នុងខណ្ឌទួលគោក រាជធានីភ្នំពេញ ។

AUPP បានបង្ហាញវត្តមាន នៅក្នុងប្រទេសកម្ពុជា រយះពេលមួយឆ្នាំ មកហើយពោលតាំងពីថ្ងៃទី២៤ ខែឧសភា ឆ្នាំ២០១៣ ហើយកាលពីថ្ងៃទី២៤ ខែឧសភា ឆ្នាំ២០១៤កន្លងទៅនេះ ថ្នាក់ដឹកនាំសាលា បានរៀបចំកម្មវិធី ខួបមួយឆ្នាំ ដោយបានធ្វើឡើងក្រោមវត្តមាន របស់រដ្ឋមន្រ្តី ក្រសួងអប់រំ យុវជន និងកីឡា លោក ហង់ ជួនណារ៉ុន ព្រមទាំងមន្រ្តីជាន់ខ្ពស់ នៃរាជរដ្ឋាភិបាល មួយចំនួនទៀត ។

តាមថ្នាក់ដឹកនាំ AUPP បានបញ្ជាក់ថា AUPP កំពុងបង្ហាញវត្តមាន នៅក្នុងប្រទេសកម្ពុជានេះ គឺមានទិសដៅ បណ្តុះបណ្តាលកូនខ្មែរ តាមស្តង់ដារ អាម៉េរិកាំង សុទ្ធសាធ ដោយសៀវភៅ និងការបង្រៀនយកតាមអាម៉េរិក ទាំងអស់ ជាពិសេសនោះ គ្រូៗសុទ្ធតែជា ជនជាតិអាម៉េរិកតែម្តង ។

បើទោះបីចាប់កំណើត មួយឆ្នាំ នៅក្នុងប្រទេស កម្ពុជាក៏ពិតមែន តែ AUPP កាលពីឆ្នាំសិក្សា២០១៣-២០១៤ កន្លងទៅ មាននិស្សិតចំនួន៣៤នាក់ ដែលមកសិក្សា ហើយចំនួននិស្សិត ទាំង៣៤នាក់ខាងលើនេះ សុទ្ធតែឆ្លងកាត់ការ ប្រឡងធ្វើតេស្ត យ៉ាងតឹងរឹង និងលំបាក ពោលមាន អ្នកមកដាក់ពាក្យ សុំចូលរៀនជាច្រើននាក់តែ ចុងក្រោយជ្រើសរើសបានតែចំនួន៣៤នាក់ប៉ុណ្ណោះ ដែលមានសមត្ថភាព អាចចូលសិក្សាបន្ត ។

ថ្នាក់ដឹកនាំ AUPP បានបញ្ជក់ថា សម្រាប់ការបង្កើត សកលវិទ្យាល័យ មួយនេះ នៅស្រុកខ្មែរ គឺដើម្បីបណ្តុះបណ្តាល កូនខ្មែរ ឲ្យមានចំណេះដឹងខ្ពស់ លើគ្រប់មុខជំនាញ ទាំងភាសាអង់គ្លេស ហើយជាពិសេសទៀតនោះ នឹងកាន់តែចាប់ អារម្មណ៍ខ្លាំងឡើង គឺនិស្សិតដែលបាន រៀននៅ AUPP អាចបន្តការសិក្សា នៅតាមសកលវិទ្យាល័យ នៅសហរដ្ឋអាម៉េរិក ដោយស្វ័យប្រវត្តិ ពីព្រោះថា AUPP ត្រូវបានសកលវិទ្យាល័យល្បីៗ ធំៗ នៅអាម៉េរិក ទទួលស្គាល់ ពីគុណភាព របស់ខ្លួន ។

បើតាមការឲ្យដឹងពីថ្នាក់ដឹកនាំ AUPP សម្រាប់ឆ្នាំ សិក្សា២០១៤នេះ សាលានឹងរង់ចាំទទួលពាក្យ សុំការចូលប្រឡង ក្រោយពីសិស្សទាំងនោះ បានបញ្ចប់ថ្នាក់ទី១២ នាខែកក្កដា ឆ្នាំ២០១៤ខាងមុខនេះ ហើយ AUPP ក៏បានប្រកាសផងដែរ ចំពោះការជ្រើសរើស និងផ្តល់អាហារូបករណ៍ ចំនួន ៥កន្លែង ដល់និស្សិត ដែលមានជីវភាពក្រីក្រ តែសមត្ថភាពខ្លាំង ។

បើលោកអ្នកជាអាណាព្យាបាល ចង់ឃើញកូនរបស់ អស់ លោកអ្នក មានឱកាស បន្តការសិក្សានៅអាម៉េរិក និងមានអានាគត ភ្លឺស្វាង ត្រជះត្រចង់ សូមមកដាក់ពាក្យ នៅ AUPP ដើម្បីប្រឡងចូលសិក្សា បើទោះបីជាតម្លៃ មានចំនួន៩០០០ដុល្លារ ក្នុងមួយឆ្នាំក៏ដោយ ប៉ុន្តែការអប់រំ ការបណ្តុះបណ្តាល មានស្តង់ការតាមអាម៉េរិកាំង សុទ្ធសាធតែម្តង។

 ទីប្រឹក្សារបស់ AUPP និងជា អ្នកយកព័ត៌មាន ជើងចាស់ លោក ពុយ គា បានថ្លែងថា ការចូលរួមពិធីខួប ១ឆ្នាំរបស់ AUPP ដោយមានអ្នកចូលរួម រហូតទៅដល់ ១០០០នាក់ នាពេលកន្លងទៅនេះ បានបង្ហាញឲ្យឃើញថា តាមរយៈការសិក្សា និងកម្មវិធីបង្រៀន តាមស្តង់ដារអាម៉េរិកាំង ប្រកបដោយ គុណភាពខាងលើនេះ ធ្វើឲ្យ មានការចូលរួម និងចាប់អារម្មណ៍កាន់តែខ្លាំង ពីសំណាក់អាណាព្យាបាល សិស្ស និស្សិត នៅកម្ពុជា ។

លោក ពុយ គា បានថ្លែង ដោយរំពឹងថា សម្រាប់ឆ្នាំសិក្សាខាងមុខ សិស្សដែលមកដាក់ពាក្យសុំចូលប្រឡង ដើម្បីបានសិក្សា នឹងមានចំនួនកើនឡើងទ្វេដង បើប្រៀបធៀប និងចំនួននិស្សិតដែលបានសិក្សា នៅឆ្នាំ ២០១៣-២០១៤ ចំនួន ៣៤នាក់ ។

 ទីប្រឹក្សាសកលវិទ្យាល័យ រូបនេះ បានបញ្ជាក់ទៀតថា បើទោះបីតម្លៃសិក្សាខ្ពស់ ជាងសកលវិទ្យាល័យនៅ ប្រទេសកម្ពុជាក៏ដោយនោះ ប៉ុន្តែសម្រាប់គុណភាពវិញ គឺមានលក្ខណ:ស្តង់ដារ តាមបែបការសិក្សានៅអាម៉េរិក និងមសនការទទួលស្គាល់ ពីគុណភាពអប់រំ របស់សកលវិទ្យាល័យធំៗនានា នៅក្នុងប្រទេសមហា អំណាចមួយនេះ ។

រដ្ឋមន្រ្តីក្រសួងអប់រំ លោក ហង់ជួន ណារ៉ុន ចង់អោយ AUPP ក្លាយជាសកលវិទ្យា ល័យគំរូ និងឈានមុខគេនៅកម្ពុជា តាមរយ:ការផ្តល់នូវគុណភាព អប់រំដល់សិស្ស និស្សិតទាំងឡាយ ដែលមកសិក្សានៅទីនេះ ប៉ុន្តែលោករដ្ឋមន្រ្តី បានជំរុញឲ្យនិស្សិតទាំងអស់ ត្រូវស្វែងយល់ និងខិតខំប្រឹងប្រែង ស្វែងរកចំណេះដឹង ដោយខ្លួនឯងផងដែរ ៕

ទីតាំងសកលវិទ្យាល័យ អាម៉េរិកាំង ភ្នំពេញ នៅជាប់របងមជ្ឈមណ្ឌលទួលគោក ខណ្ឌទួលគោក រាជធានីភ្នំពេញ

រដ្ឋមន្រ្តី ក្រសួងអប់រំ លោក ហង់ ជួនណារ៉ុន ឡើងថ្លែងនៅក្នុងពិធីខួបមួយឆ្នាំ របស់AUPP

និសិត្ស តាំង ប៊ុនហុង (អតីតសិស្សពូកែ គណិតវិទ្យាលេខ២ ទូទាំងប្រទេស) និងនិសិត្ស ម៉ៅ វុឌ្ឍីតា តំណាងនិសិត្សឡើងបង្ហាញពីបទពិសោធន៍ និងការរៀនសូត្រ នៅ AUPP

លោក ពុយ គា ទីប្រឹក្សារបស់ សកលវិទ្យាល័យ ផ្តល់បទសម្ភាសន៍ ដល់ក្រុមសារព័ត៌មាន

អ្នកចូលរួមជាច្រើនរយនាក់ នៅក្នុងពិធីខួបមួយឆ្នាំរបស់ AUPP

ភ្នំពេញ ៖ វិទ្យាស្ថានខុងជឺ នៃរាជបណ្ឌិត្យ សភាកម្ពុជា រសៀលថ្ងៃទី០៤ ខែមិថុនា ឆ្នាំ២០១៤ បាន រៀបចំកម្មវិធីស្ពានភាសាចិនលើកទី១៣ នៅលើពិភពលោក ក្រោមជំនួយ ឧបត្ថម្ភពីស្ថានទូតសាធារណរដ្ឋ ប្រជាមានិតចិន ប្រចាំនៅព្រះរាជាណាចក្រកម្ពុជា និងគាំទ្រពីសាកលវិទ្យាល័យ អាស៊ី អឺរ៉ុប បណ្ណាគារស៊ីនជឺ និងវិទ្យុមិត្តភាពកម្ពុជា-ចិន។

លោកបណ្ឌិត ជា មុនីឫទ្ធិ នាយកវិទ្យាសា្ថនខុងជឺ នៃរាជបណ្ឌិត្យសភា កម្ពុជា បានមានប្រសាសន៍ថា កម្មវិធីស្ពានភាសាចិននេះ បានផ្តល់ឱកាសដល់និស្សិតកម្ពុជា បង្ហាញនូវភាពក្លាហានរបស់ខ្លួន សមត្ថ ភាពភាសានិងវប្បធម៌ចិន ដើម្បីតំណាង ឱ្យបេក្ខភាពកម្ពុជា ទៅចូលរួមប្រកួតនៅប្រទេសចិន ជាមួយ និស្សិតមកពីបណ្តាប្រទេសនានា នៅទូទាំងពិភពលោក។ ក្នុងន័យនេះ បេក្ខជនជ័យលាភីមិនត្រឹម តែមានឱកាសទៅបំពេញទស្សនកិច្ចសិក្សា នៅប្រទេសចិនប៉ុណ្ណោះទេ តែថែមទាំងបានជួយផ្សព្វផ្សាយ ពីកិត្តិនាមរបស់កម្ពុជានៅលើឆាកអន្តរជាតិទៀតផង។ លើសពីនេះ បេក្ខជនតំណាងកម្ពុជា អាចទាញយក ឱកាសនេះទៅផ្សព្វផ្សាយពីភាសា វប្បធម៌ និងតំបន់ទេសចរណ៍នានា របស់កម្ពុជាដល់មិត្តភក្កិបរទេស ហើយទាក់ទាញមិត្តភក្កិបរទេសទាំងអស់មកទស្សនាកម្ពុជាទៀតផង ។

លោក ឌួង លាង ទីប្រឹក្សាអមទីស្តីការគណៈរដ្ឋមន្ត្រី និងជាសាកលវិទ្យាធិការ សាកលវិទ្យាល័យ អាស៊ី អឺរ៉ុប បានថ្លែងនូវការកោតសរសើរ ចំពោះសកម្មភាពរីកចម្រើន របស់វិទ្យាស្ថានខុងជឺ នៃរាជបណ្ឌិត្យ សភាកម្ពុជា និងកិច្ចគាំទ្រ របស់ស្ថានទូតសាធារណរដ្ឋប្រជាមានិតចិន ដែលតែងតែគាំទ្រដល់ បេសកកម្ម របស់រាជបណ្ឌិត្យសភាកម្ពុជានិយាយរួម វិទ្យាស្ថានខុងជឺនៃរាជបណ្ឌិត្យសភាពកម្ពុជានិយាយដោយឡែក ព្រមទាំងផ្តល់អនុសាសន៍ណែនាំដល់បេក្ខជនដែលបានឈានចូលដល់ការប្រឡងផ្តាច់ព្រ័ត្រមានចំនួន១០នាក់ ដែលក្នុងនោះមានស្ត្រី ០៧នាក់ ឱ្យបង្ហាញនូវសមត្ថភាពពុទ្ធិរបស់ខ្លួន ហើយដោយឡែក បេក្ខជន ដែលត្រូវទៅចូលរួមប្រឡងនៅសាធារណរដ្ឋប្រជាមានិតចិន ត្រូវរៀបចំខ្លួនឱ្យសមជាជនជាតិខ្មែរ ដែលជាជនជាតិមួយមានអារ្យធម៌ខ្ពង់ខ្ពស់ ។

លោកបន្ថែមទៀតថា វិទ្យាស្ថានខុងជឺ បានរៀបចំនូវកម្មវិធីស្ពានភាសាចិន សម្រាប់និស្សិតឧត្តម សិក្សា ដែលចាត់ទុកជាកម្មវិធីមួយរបស់វិទ្យាស្ថានខុងជឺក្នុងការផ្តល់ឱកាសដល់និស្សិតកម្ពុជា ដែល មាន អាយុចាប់ពី១៨ឆ្នាំ ដល់ ៣០ឆ្នាំ ហើយដែលមានដើមកំណើត មិនមែនជាជនជាតិចិន ទៅបំពេញទស្សន កិច្ចនិងសិក្សារៀនសូត្រ នៅសាធារណរដ្ឋប្រជាមានិតចិន។

នៅទីបំផុតបេក្ខជន អ៊ឹង គីមលីញ និស្សិតមកពីសាកលវិទ្យាល័យ អាស៊ី អឺរ៉ុបបានទទួលជ័យលាភីលេខ១ តំណាងឱ្យកម្ពុជាទៅចូលរួមប្រកួតវគ្គផ្តាច់ព្រ័ត្រជាលក្ខណៈអន្តរជាតិនៅទីក្រុង ថាង សាង នៃប្រទេសចិន នាខែកក្កដាចុងឆ្នាំនេះ ដែលមានបេក្ខជនតំណាងមកពី១០៤ប្រទេសផ្សេងទៀតចូលរួមប្រកួត៕

ភ្នំពេញ ៖ កម្លាំងនគរបាលការិយាល័យ ព្រហ្មទណ្ឌកម្រិតធ្ងន់រាជធានីភ្នំពេញ សហការជាមួយកម្លាំងនគរបាលព្រហ្មទណ្ឌ ខណ្ឌទួលគោក ដឹកនាំដោយតំណាងអយ្យការ លោកលី សុផាន់ណា នៅវេលាម៉ោង២និង៣០នាទី រសៀលថ្ងៃទី១១ ខែមិថុនា ឆ្នាំ២០១៤ បានចុះទៅទៅឡោមព័ទ្ធនៅកន្លែងជួសជុល រថយន្ដក្នុងដីឡូត៍មួយកន្លែង ស្ថិតនៅតាមផ្លូវបេតុង ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ បន្ទាប់ពីមានជនរងគ្រោះម្នាក់ រាយការណ៍ជូនសមត្ថកិច្ចថា កន្លែងជួសជុលរថយន្ដខាងលើនេះ អាចជាកន្លែងលាក់រថយន្ដ ដែលចោរលួច ហើយយកទៅលក់នៅទីនេះ ។

មន្ដ្រីនគរបាលដែលចូលរួមនៅក្នុងប្រតិ បត្ដិការនេះបាននិយាយថា មុនពេលកើតហេតុ បុរសម្នាក់ដែលបាត់រថយន្ដម៉ាកសាំយ៉ុងរបស់ខ្លួនជាយូរថ្ងៃមកនោះ ស្រាប់តែប្រទះឃើញគេយករថយន្ដនេះទៅ លាងនៅកន្លែងលាងរថយន្ដ ក្នុងខណ្ឌទួលគោក ។

ក្រោយពីប្រទះឃើញរថយន្ដរបស់ខ្លួនរួច មក ម្ចាស់រថយន្ដបានរាយការណ៍ជូនសមត្ថ កិច្ច រួចហើយកម្លាំងសមត្ថកិច្ចក៏បានចុះទៅ សួរនាំ រហូតឈានទៅដល់ការចុះឆែកឆេរ នៅយានដ្ឋានក្នុងដីឡូត៍នៅក្នុងសង្កាត់ទឹកថ្លា ខណ្ឌសែនសុខ ។

មន្ដ្រីនគរបាលបានបន្ដថា ពេលទៅដល់ យានដ្ឋានខាងលើ កម្លាំងសមត្ថកិច្ចបានរក ឃើញរថយន្ដសាំយ៉ុង ចំនួន៣គ្រឿង និងស្ដា រិច ចំនួន២គ្រឿង នៅក្នុងយានដ្ឋានមួយនេះ។

នៅពេលចុះឆែកឆេរនោះ កម្លាំងសមត្ថ កិច្ចក៏បានឃាត់ខ្លួនម្ចាស់យានដ្ឋាន ឈ្មោះ កៃ គួង ដែលមានប្អូនប្រុសម្នាក់រកស៊ីជាមួយ ឈ្មោះកៃ រ៉ា ដោយសង្ស័យថា ពួកគេទាំងពីរនាក់ អាចជាប់ពាក់ព័ន្ធនិងការរកស៊ី បទល្មើសលួចរថយន្ដ ហើយមកលាក់ទុកនៅទីនេះ ។

យ៉ាងណាក៏ដោយ សមត្ថកិច្ចបាននឹងកំពុង ពិនិត្យមើលស្ថាកលេខ និងលេខតួម៉ាស៊ីន ដើម្បីពិនិត្យឱ្យឃើញថា តើរថយន្ដដែលត្រូវ លាក់ទុក នៅក្នុងយានដ្ឋានខាងលើនេះ ជា រថយន្ដត្រូវបានលួចឬមួយយ៉ាងណានោះ។

ដោយឡែករថយន្ដមួយគ្រឿងម៉ាកសាំ យ៉ុង ដែលម្ចាស់អះអាងថា ជារថយន្ដរបស់ខ្លួន ហើយប្រទះឃើញនៅកន្លែងលាង ត្រូវបានសមត្ថកិច្ចយកទៅប្រគល់ឱ្យជនរង គ្រោះហើយ ក្រោយពីពិនិត្យឯកសារ លេខ តួលេខម៉ាស៊ីនយ៉ាងត្រឹមត្រូវរួចមក ៕